طلاق نامہ پر زبر دستی دستخط لیے جانے کے بعد زبانی بھی تین طلاق دلوائی جائیں تو کیا حکم ہے ؟

جنابِ عالی! گزارش ہے کہ میں مسمیٰ محمد امجد ولد محمد اسلم ساکن مکان نمبر B.22 قذافی ٹاؤن قائد آباد کراچی کا رہائشی ہوں، میری شادی مسماۃ ثناء بی بی دختر شیر افضل محمدی گل سے 18/01/2021 کو ہوئی تھی، جس سے میری ایک بچی بھی ہے، مؤرخہ 13/12/2023 کو جرگہ میں مجھ سے زبردستی ایک کاغذ پر دستخط کرائے گئے، جس پیپر کو نہ مجھے پڑھایا گیا، نہ ہی مجھ سے پوچھا گیا، اس پر طلاق نامہ لکھا ہوا تھا، میں نے خود سے کوئی طلاق نہیں دی، مجھے دھمکی دے کر دستخط کرائے کہ خون خرا بہ ہوجائے گا، لہذاآنجناب سے درخواست ہے کہ شرعی فتویٰ دیا جائے کہ طلاق ہوگئی ہے یا نہیں، اور کیا میں اپنی بیوی کے ساتھ رہ سکتاہوں یا نہیں؟
نوٹ: سائل سے خون خرابہ کی دھمکی دے کر یہ پیپر سائن کروایا گیا اور منہ سے تین بار یہ جملہ بلوایا گیا کہ " میں طلاق دیتا ہوں، طلاق دیتا ہوں، طلاق دیتا ہوں" ۔

الجوابُ حامِدا ًو مُصلیِّا ً

صورت مسؤلہ میں ذکر کردہ تفصیل کے مطابق مذکور جرگہ کے افراد کا سائل سے زبردستی طلاق لینا ناجائز عمل تھا جس کی وجہ سے وہ سخت گناہ گار ہوئے ہیں، تاہم جب سائل نے مذکور الفاظ" ،میں طلاق دیتا ہوں، طلاق دیتا ہوں، طلاق دیتا ہوں" تین مرتبہ زبان سے کہہ دیے تو اس کی بیوی پر تینوں طلاقیں واقع ہوکر حرمتِ مغلظہ ثابت ہوچکی ہے، اب رجوع نہیں ہوسکتا، اور نہ ہی حلالۂ شرعیہ کے بغیر دوبارہ باہم عقدِ نکاح ہوسکتا ہے، جبکہ عورت ایامِ عدت گزارنے کے بعد دوسری جگہ نکاح کرنے میں بھی آزاد ہے، اور حلالۂ شرعیہ یہ ہے کہ عورت ایامِ عدت گزارنے کے بعد بغیر کسی شرط کے کسی مسلمان سے اپنا عقد نکاح کرے، چنانچہ اگر وہ دوسرا شخص بھی اسے ایک مرتبہ ہمبستری (جو کہ حلالۂ شرعیہ کے تحقق کے لئے ضروری ہے ) کے بعد فوراً یا ازدواجی زندگی کے کچھ عرصہ بعد طلاق دیدے یا طلاق تو نہ دے ، مگر اس کا پہلے انتقال ہو جائے ، تو بہر صورت اس کی عدت گزارنے کے بعد اگر وہ پہلے شوہر کے عقدِ نکاح میں آنا چاہے اور پہلا شوہر بھی اسے رکھنے پر رضامند ہو تو نئے مہر کے تقرر کے ساتھ گواہوں کی موجودگی میں دوبارہ عقد نکاح کر کے باہم میاں بیوی کی حیثیت سے زندگی بسر کر سکتے ہیں، تاہم حلالہ اس شرط کے ساتھ کرنا کہ زوجِ ثانی ہمبستری کے بعد بیوی کو طلاق دیگا، تا کہ زوجِ اول دوبارہ اس کے ساتھ عقدِ نکاح کرے , یہ مکروہِ تحریمی ہے ،اور اس پر حدیث میں وعید یں وارد ہوئی ہیں ، لہذا ایسے حلالہ سے احتراز لازم ہے ، البتہ بلا شرط ایسا کرنا بلا شبہ جائز اور درست ہے۔

مأخَذُ الفَتوی

کما فی بدائع الصنائع: وأما كون الزوج طائعا فليس بشرط عند أصحابنا وعند الشافعي شرط حتى يقع طلاق المكره عندنا وعنده لا يقع ونذكر المسألة في كتاب الإكراه إن شاء الله تعالى وذكر محمد بإسناده «أن امرأة اعتقلت زوجها وجلست على صدره ومعها شفرة فوضعتها على حلقه، وقالت: لتطلقني ثلاثا أو لأنفذنها فناشدها الله أن لا تفعل فأبت فطلقها ثلاثا فذكر لرسول الله صلى الله عليه وسلم فقال لا قيلولة في الطلاق اھ (فصل فی شرائط رکن الطلاق، ج 3، ص 100، ط: سعید)۔
و فی الدر المختار: (ويقع طلاق كل زوج بالغ عاقل) ولو تقديرا بدائع، ليدخل السكران (ولو عبدا أو مكرها) فإن طلاقه صحيح لا إقراره بالطلاق(کتاب الطلاق، ج 3، ص 235، ط: سعید)۔
و فی الھندیۃ: وإن كان الطلاق ثلاثا في الحرة وثنتين في الأمة لم تحل له حتى تنكح زوجا غيره نكاحا صحيحا ويدخل بها ثم يطلقها أو يموت عنها كذا في الهداية الخ ( فصل فیما تحل بہ المطلقۃ، ج 1، ص 473، ط: ماجدیہ)۔