"میرا تم سے کوئی تعلق نہیں" کے الفاظ سے طلاق کا حکم

میری شادی کو 14 سال ہو چکے ہیں اور میرا ایک مسئلہ ہے جس کے لئے مجھے رہنمائی کی ضرورت ہے ، آج سے تقریباً 3 سال پہلے میں نے مختلف مرتبہ اپنی بیوی کو میسج کیا کہ میرا تم سے کوئی تعلق نہیں ، پھر ایک بار میسج کیا کہ میرا تم سے کوئی تعلق نہیں ، پھر ایک بار میسج کیا کہ مجھے تمہارے ساتھ نہیں رہنا، میری نیت اس سے کچھ نہیں تھی اور نہ میں یہ کبھی چاہتا، ہم ابھی الگ رہ رہے ہیں ، اور میں چاہتا ہوں کہ مجھے صحیح رہنمائی ملے ، تاکہ آگے بڑھوں براہِ کرم میری رہنمائی فرمائیں ۔

الجوابُ حامِدا ًو مُصلیِّا ً

مفتی غیب نہیں جانتا ، وہ سوال کے مطابق جواب دینے کا پابند ہوتاہے ، سوال کے سچ یاجھوٹ پر مبنی ہونے کی اصل ذمہ داری سوال کرنے والے پر عائد ہوتی ہیں ، اس مختصر تمہید کے بعد واضح ہو کہ سوال میں ذکر کردہ تفصیل اگر واقعۃً درست اور مبنی بر حقیقت ہو ، اور واقعۃً سائل نے مذکور الفاظ نیت اور مذاکرۂ طلاق کے بغیر کہے ہوں ، تو اس سے سائل کی بیوی پر کوئی طلاق واقع نہیں ہوئی ، بلکہ وہ حسبِ سابق میاں بیوی کی طرح زندگی بسر کر سکتے ہیں ، جبکہ آئندہ کے لئے اس قسم کے معاملات میں بہت زیادہ احتیاط کی ضرورت ہے ۔

مأخَذُ الفَتوی

کما فی الدرالمختار: (كنايته) عند الفقهاء (ما لم يوضع له) أي الطلاق (واحتمله) وغيره (ف) الكنايات (لا تطلق بها) قضاء (إلا بنية أو دلالة الحال) وهي حالة مذاكرة الطلاق أو الغضب،الخ ( ج3 ص 296 باب الکنایات ط سعید)۔
وفیہ ایضاً: (وفي الغضب) توقف (الأولان) إن نوى وقع وإلا لا الخ (ج3 ص 301 باب الکنایات ط سعید )۔