"ایک دو تین ،تمیں طلاق دیتا ہوں"کہنے سے کتنی طلاقیں واقع ہوں گی ؟

میں نے کال پے اپنی بیوی کو ایک ،دو ،تین ،تمہیں طلاق دیتا ہوں ،ایسے کہاں ہے؟

الجوابُ حامِدا ًو مُصلیِّا ً

وا ضح ہوکہ ایک، دو، تین، عدد ہیں ،اور گنتی کے لئے و ضع ہیں ،نہ کہ طلاق کے لئے،اس لئے اگر کوئی شخص فقط یہی گنتی کے عدد استعمال کرئے ،تو اس سے طلاق واقع نہیں ہوتی ،لیکن اگر ان اعدادکے ساتھ لفظِ طلاق بھی ذکر کر دیا جائے ،تو عرفاً ان اعداد سے مراد بھی طلاق ہوتی ہے،لہذا صورتِ مسئولہ میں سائل نےکال پر اپنی بیوی سے بات کرتے ہوئے جب مذکور الفاظ "ایک دو تین تمہیں طلاق دیتا ہوں"کہہ دیئے ہوں ،تو اس سے سائل کی بیوی پر تینوں طلاقیں واقع ہو کر حرمتِ مغلظہ ثابت ہو گئی ہے،جس کے بعد رجوع نہیں ہوسکتا،اور حلالۂ شرعیہ کے بغیر دوبارہ باہم عقدِ نکاح بھی نہیں ہو سکتا،جبکہ عورت ایامِ عدت کے بعد دوسری جگہ نکاح کرنے میں بھی آزاد ہوگئی ، اور حلالۂ شرعیہ یہ ہے کہ عورت اپنے شوہر سے علیحدگی اور عدتِ طلاق گزارنے کے بعد بغیر کسی شرط کے کسی دوسرے مسلمان شخص سے نکاح کرے ،اور حقوقِ زوجیت ادا کرے ، چنانچہ اب اگر وہ دوسرا شخص بھی اس سے ایک مرتبہ ہمبستری (جو کہ حلالۂ شرعیہ کے لئے ضروری ہے) کے فوراً بعد یا ازدواجی زندگی کے کچھ عرصے بعد طلاق دیدے ، یا بیوی سے پہلے شوہر کا انتقال ہو جائے ، بہر صورت اس کی عدت گزارنے کے بعد اگر وہ پہلے شوہر کے نکاح میں آنا چاہے ، اور پہلا شوہر بھی اس کو رکھنے پر رضامند ہو تو نئے مہر کے تقرر کے ساتھ گواہوں کی موجودگی میں دوبارہ عقدِ نکاح کر کے باہم میاں بیوی کی حیثیت سے زندگی بسر کر سکتے ہیں ، تاہم حلالۂ اس شرط کے ساتھ کرنا کہ زوجِ ثانی نکاح کے بعد طلاق دے تاکہ زوجِ اول کے لئے عورت دوبارہ حلال ہو جائے ،مکروہِ تحریمی ہے ، اور احادیثِ مبارکہ میں ایسے عمل کرنے والوں کو ملعون قرار دیا گیا ہے ، البتہ بغیر شرط کے بلاشبہ جائز اور درست ہے۔

مأخَذُ الفَتوی

کما قال اللہ تعالیٰ : { فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ { (البقرہ : 230)۔
و فی الہندیہ : و إن كان الطلاق ثلاثا في الحرة و ثنتين في الأمة لم تحل له حتى تنكح زوجا غيره نکاحا صحيحا و يدخل بها ثم يطلقها أو يموت عنها، كذا في الهداية الخ(473/1)۔
و فی در المختار:( و الطلاق يقع بعدد قرن به لا به) نفسه عن ذكر العدد، و عند عدمه الوقوع بالصيغة.اھ(3/287) ۔
و فی رد المختار :و علم مما ذكرنا أنه لو قرنه بالعدد ابتداء فقال: أنت طالق ثنتين، أو قال ثلاثا يقع لما سيأتي في الباب الآتي أنه متى قرن بالعدد كان الوقوع به اھ(3/250)۔