’’یہ مسجد نہیں کنجر خانہ ہےاور یہ شیطانوں کا گھر ہے‘‘ کہنے کا حکم

کیا فرماتے ہیں علماءِ کرام و مفتیانِ عظام اس مسئلہ کے بارے میں کہ جو شخص خانۂ خدا کی نسبت ایسے الفاظ کہہ دے جو مناسب نہ ہوں ، الفاظ اس کے یہ ہیں" یہ مسجد نہیں، کنجرخانہ ہےاور یہ شیطانوں کا گھر ہے" ان الفاظ کی وجہ سے یہ شخص مسلمان رہ سکتا ہے یا نہیں ؟اور کیا اس کا نکاح ان الفاظ کی وجہ سے باقی رہ سکتا ہے؟

الجوابُ حامِدا ًو مُصلیِّا ً

مسجد شعائر اللہ میں سے ہے اور اس کیلیے مذکور الفاظ استعمال کرنا کفر ہے اور اس کی وجہ سے آدمی دائرۂ اسلام سے خارج ہوجاتا ہے۔ تا ہم اگر شخصِ مذکور نے یہ الفاظ امامِ مسجد یا متولیانِ مسجد وغیرہ کے ناجائز فعل کی بناء پر کہے ہوں اور مسجد کی تحقیر قطعاً مقصود نہ ہو تو اگرچہ اس صورت میں وہ کافر نہیں بنا اور اس کا عقدِ نکاح بھی باقی ہے، مگر خانۂ خدا کی طرف مذکور ناجائز اور شیطانی الفاظ کی نسبت کرنے کی بناء پر وہ سخت گناہگار ہوا ہے، اُسے چاہیے کہ اپنے مذکور گناہ پر صدقِ دل سے توبہ و استغفار کرے اور آئندہ کیلۓ اس قسم کے الفاظ استعمال کرنے سے مکمل احتراز بھی کرے۔

مأخَذُ الفَتوی

فی شرح الفقه الاکبر : و فی تتمة الفتاوی : من استخف بالقرآن او بالمسجد او بنحوہ ممایعظم فی الشرع کفراھ(ص:167)۔
و فی مجمع الأنهر في شرح ملتقى الأبحر : إذا أنكر آية من القرآن و استخف بالقرآن أو بالمسجد أو بنحوه مما يعظم في الشرع أو عاب شيئا من القرآن أو خطئ أو سخر بآية منه كفراھ(2/ 507)۔
و فی بريقة محمودية في شرح طريقة محمدية و شريعة نبوية : و من استخف بالمسجد أو بنحوه مما يعظم في الشرع كفراھ(2/ 391)۔