قادیانی بننے کا مشورہ دینے والے شوہر کے ایمان و نکاح کا حکم؟

میں یہ جاننا چاہتی ہوں کہ میرے شوہر نے مجھے قادیانی ہونے کا مشورہ دیا تھا، میرا یہاں پر ویزہ حاصل کرنے کے لئے ، لیکن میں نے ایسا نہیں کیا، میں یہ جاننا چاہتی ہوں کہ میرے شوہر کے ایسا بولنے کی وجہ سے ان پر تجدید ایمان لازمی ہوتا ہے؟ اور جس شخص کا ایمان ختم ہوجائے تو اس کی بیوی اس کے نکاح میں نہیں رہتی،تو کیا اب میں اس کے نکاح سے آزاد ہوگئی ہوں؟

الجوابُ حامِدا ًو مُصلیِّا ً

سائلہ کا بیان اگر واقعۃً درست اور مبنی برحقیقت ہو، اس طور پرکہ سائلہ کے شوہر نے ویزے کے حصول کے لئے اسے (العیاذ باللہ) قادیانی ہونے کا مشورہ دیا ہو تو اس کی وجہ سے سائلہ کے شوہر کا ایمان ختم ہوچکا ہے، اس لئے اس پر لازم ہے کہ بصدق دل توبہ واستغفار کرکے تجدید ایمان و تجدید نکاح بھی کرے، اور آئندہ کے لئے ایسے کلمات کفریہ کہنے سے مکمل اجتناب کرے۔

مأخَذُ الفَتوی

کما فی البحر الرائق: ويكفر بتلقين كلمة الكفر ليتكلم بها ولو على وجه اللعب وبأمره امرأة بالارتداد لتبين من زوجها وبالإفتاء بذلك وإن لم تكفر المرأة بناء على أن الرضا بكفر غيره كفر الخ (ج5 صـ133 ، ط: دار الکتاب الاسلامی)۔
وفی الھندیۃ: (ومنها) ما يتعلق بتلقين الكفر والأمر بالارتداد وتعليمه والتشبيه بالكفار وغيره من الإقرار صريحا وكناية إذا لقن الرجل رجلا كلمة الكفر، فإنه يصير كافرا، وإن كان على وجه اللعب وكذا إذا أمر رجل امرأة الغير أن ترتد وتبين من زوجها يصير هو كافرا هكذا روي عن أبي يوسف، وعن أبي حنيفة رحمه الله تعالى أنّ مَنْ أمر رجلاً ان يكفر كان الآمر كافرًا، كفر المأمور أو لم يكفر۔(ج2 صـ275-276 ، ط: دار الفکر)۔
واللہ اعلم بالصواب