مفتی صاحب! میں درج ذیل مسئلے پر آپ کی رہنمائی چاہتا ہوں:
جس وقت میاں بیوی کے درمیان طلاق کے تعلق سے کوئی جھگڑا، اختلاف یا بات چیت نہیں چل رہی تھی، اس وقت شوہر نے اپنی بیوی کو ایک ٹیکسٹ میسج بھیجا۔ اس میسج میں طلاق کے حوالے سے کوئی لفظ یا جملہ نہیں تھا، بلکہ صرف ایک عدد (نمبر یا ڈیجٹ، مثال کے طور پر: 1، 2 یا 3) تھا۔ لیکن میسج بھیجنے کے وقت شوہر کے دل میں یہ نیت تھی کہ یہ عدد (نمبر) اس کی بیوی کو دی جانے والی طلاقوں کی تعداد کو ظاہر کرتا ہے۔
شریعتِ اسلامیہ کے مطابق، کیا صرف ایک عدد والا میسج بھیجنے اور دل میں نیت کرنے سے (بغیر کسی لفظ یا تحریر کے) طلاق واقع ہو جاتی ہے؟ حنفی مسلک کی روشنی میں اس مسئلے کا تفصیلی حکم بیان فرما کر مجھے مستفیض فرمائیں۔ جزاک اللہ خیرا۔
واضح ہو کہ "ایک"، "دو"، "تین" کا لفظ عدد کے لیے وضع ہے، طلاق کے لیے نہیں؛ جبکہ وقوعِ طلاق کے لیے شوہر کا زبان سے طلاق کے واضح یا اس کے مفہوم پر مشتمل الفاظ (کنایات) کی ادائیگی ضروری ہے۔ لہذا صورتِ مسئولہ میں اگر شوہر نے واقعۃطلاق سے متعلق کوئی لفظ لکھے بغیر صرف (۱، ۲، ۳) کا عدد لکھ کر بیوی کو ارسال کر دیا ہو، اگرچہ طلاق ہی کی نیت سے ہو، تب بھی اس سے سائل کی بیوی پر کوئی طلاق واقع نہیں ہوئی؛ لہذا وہ دونوں میاں بیوی کی طرح ساتھ رہ سکتے ہیں، لیکن آئندہ شوہر کو اس معاملے میں خوب احتیاط چاہیے۔
كما في الدر المختار: (ومحله المنكوحة) وأهله زوج عاقل بالغ مستيقظ وركنه لفظ مخصوص خال عن الاستثناء. إلخ
وقال ابن عابدين في حاشيته: (قوله وركنه لفظ مخصوص) هو ما جعل دلالة على معنى الطلاق من صريح أو كناية فخرج الفسوخ على ما مر، وأراد اللفظ ولو حكما ليدخل الكتابة المستبينة وإشارة الأخرس والإشارة إلى العدد بالأصابع في قوله أنت طالق هكذا كما سيأتي. وبه ظهر أن من تشاجر مع زوجته فأعطاها ثلاثة أحجار ينوي الطلاق ولم يذكر لفظا لا صريحا ولا كناية لا يقع عليه كما أفتى به الخير الرملي وغيره. إلخ (كتاب الطلاق، ركن الطلاق، ج: 3، ص: 230-231، ط: ايج ايم سعيد)