السلام علیکم ورحمتہ اللہ وبرکاتہ، میرا نام محمود الحسن ہے ، مفتی صاحب! امید ہے خیریت سے ہوں گے ، ایک مسئلہ پوچھنا تھا کہ ایک لڑکی کا چھوٹی عمر میں نکاح ہوا تھا، لیکن اس کی ابھی تک رخصتی نہیں ہوئی تھی، کچھ لوگوں نے پروپیگنڈا کر کے اس لڑکی کی تصویرکسی اور لڑکے کے ساتھ ایڈیٹ کر کے اس لڑکے کو بھیج دی، وہ لڑکا غیر ملک تھا اور ان پڑھ تھا اور اصل حقائق کو پہچان نہ سکا تو لوگوں نے چال چل کے اس لڑکے سے طلاق کروائی، اس لڑکے نے طلاق اس شرط پر دی کہ ”اگر یہ تصویریں اصل ہیں تو پھر طلاق ہے، اگر تصویریں اصل نہیں ہیں تو پھر میری طلاق نہیں ہے“،تو اب تحقیق ہو گئی ہے کہ تصویریں اصل نہیں ہیں، تو اب اس بارے میں شرعی حکم کیا ہے؟
واضح ہو کہ طلاق کو کسی شرط کے ساتھ معلق کرنے کی صورت میں اس شرط کے نہ پائے جانے سے طلاق واقع نہیں ہوتی ،لہذا صورت مسئولہ مىں لڑکے نے بعض لوگوں کے پروپیگنڈا میں آکر شک وشبہ کی بنیاد پر جب طلاق كو معلق كركے مذكور الفاظ ”اگر یہ تصویریں اصل ہیں تو پھر طلاق ہے، اگر تصویریں اصل نہیں ہیں تو پھر میری طلاق نہیں ہے“کہا اور بعد میں تحقیق سے معلوم ہوگیا کہ تصویریں اصل نہیں تھیں، بلکہ ایڈیٹ شدہ تھیں ، تو اس سے اس کی بیوی پر کوئی طلاق واقع نہیں ہوئی،بلکہ دونوں کا نکاح حسب سابق برقرار ہے۔ لہذا اب دونوں رخصتی کرکے ازدواجی حیثیت سے رہ سکتے ہیں۔
كما في الدر المختار: (ربط حصول مضمون جملة بحصول مضمون جملة أخرى) ويسمى يمينا مجازا وشرط صحته كون الشرط معدوما على خطر الوجود.اهـ (باب التعليق، ج: 3، ص: 341، ط: إيج إيم سعيد)
وفي رد المحتار: تحت (قوله على خطر الوجود) أي مترددا بين أن يكون وأن لا يكون لا مستحيلا ولا متحققا لا محالة لأن الشرط للحمل والمنع وكل منهما لا يتصور فيهما شرح التحرير.اهـ (باب التعليق، ج: 3، ص: 342، ط: إيج إيم سعيد)