حضورؐ اور حضرت فاطمہؓ اور آپ کےحسنینؓ کے جنازے میں کتنے لوگ شریک ہوئے؟

کیا فرماتے ہیں علماء کرام و مفتیان عظام اس مسئلہ کے بارے میں کہ یہ میسج آج کل موبائل استعمال کرنے والے ایک دوسرے کو بھیج رہے ہیں، مجھے بھی یہ موصول ہوا، تو اس کی حقیقت کیا ہے؟ میسیج یہ ہے ’’مسلمانوں کی تابناک تاریخ ۱۰ہجری ڈیڑھ لاکھ مسلمان ۱۱ہجری رسول کریمﷺ کے جنازے میں شریک ہوئے فقط سات(۷) مسلمان۔ گیارہ ہجری حضرت فاطمہ رضی اللہ عنہا کے جنازے میں شریک ہوئے، نو مسلمان۔ ارتالیس سال بعد امام حسن رضی اللہ عنہ کے جنازے میں ہوئے ۱۳ مسلمان۔ اکسٹھ (۶۱) ہجری کی امام حسین رضی اللہ کےجنازے میں ایک بھی مسلمان شریک نہ ہوا۔ دہشتِ کربلا میں کھڑا سوچ رہا تھا اسلام، کیا ملا کافر کو مسلمان کر کے۔

الجوابُ حامِدا ًو مُصلیِّا ً

مذکور میسج اسلام دشمن عناصر کا پھیلا ہوا ہے، اس میں مذکور تمام باتیں جھوٹی اور واقعہ کے خلاف ہیں، درج ذیل چند تاریخی حوالہ جوات ملاحظہ ہو:
آپﷺ کی نماز جنازہ کے متعلق لکھا ہے کہ مدینہ میں اس وقت جتنے صحابہ اور صحابیات رضی اللہ عنہم اجمعین موجود تھے، سب نے نمازِ جنازہ پڑھی تھی۔ حتی کہ پیر کے دن زوال کے بعد سے لوگوں نے جنازہ پرھنا شروع کیا تھا اور اگلے دن تک لوگ نماز جنازہ پڑھتے رہے۔ (البدایہ و النھایہ۴/۲۴۳)
اس طرح حضرت حسن رضی اللہ کے جنازہ میں اتنی کثیر تعداد میں لوگ شریک ہوئے تھے کہ ’’غرقدِ بقیع‘‘ میں جگہ باقی نہ رہی تھی، (البدایہ و النہایہ۵/۵۲۳)
اور حضرت فاطمہ الزہرہ رضی اللہ عنہا کا جنازہ ایک قول کے مطابق خلیفہ وقت حضرت ابوبکر صدیق رضی اللہ عنہ نے پڑھایا تھا، جس میں بہت سے صحابہ کرام شریک تھے، لہٰذا مذکور تعداد کا دعویٰ کرنا بلادلیل ہے۔ (البدایہ و النہایہ ۵/۴۰)
اس لیے مسلمانوں کو اس قسم کےجھوٹے میسج سے متأثر اور پریشان ہونے کی ضرورت نہیں۔ والله أعلم بالصواب!