افضلیت ابوبکر صدیق رضی اللہ عنہ سے متعلق ایک اشکال اور اس کا جواب

حضرت جی! میں نے’’ ختم نبوت کامل‘‘ مفتی محمد شفیع کی کتاب میں ایک حدیث پڑھی ہے، ’’حدیث نمبر ۱۰۳ صفحہ نمبر ۲۶۴‘‘ مجھے اس حدیث کی تفسیر تو سمجھا دیں، اس حدیث میں حضرت ابوبکر کی شان بیان کی گئی ہے کہ جس میں یہ ہے کہ آپﷺ کے بعد امت میں نبی کا درجہ ہے، پھر حضرت ابوبکر کا درجہ ہے، کیا حدیث یہ بتارہی ہے کہ آپﷺ کے بعد کوئی نبی آئے گا ،آپ امت میں اس نبی کے درجے کے بعد حضرت ابوبکر کا درجہ ہے؟ لیکن ہمارا تو عقیدہ ہے کہ آپﷺ کے بعد کوئی نبی نہیں اس لیے آپﷺ کے بعد امت میں حضرت ابوبکر افضل ہیں، لیکن حدیث کا مطلب کچھ اور کہہ رہاہے کہ آپﷺ کے بعد کسی نبی کا درجہ ہے آپ کی امت میں، پھر حضرت ابوبکر کا ،کیا یہ حدیث ٹھیک نہیں ہے یا تفسیر کچھ اور ہے؟ جزاک اللہ

الجوابُ حامِدا ًو مُصلیِّا ً

سائل نے اس حدیث کا مطلب غلط سمجھاہے، اصل مطلب یہ ہے کہ تمام کائنات میں اللہ تعالیٰ کی ذات کے بعد افضل حضرت محمدﷺ ہیں، اس کے بعد تمام انبیاء ہیں، اس کے بعد تمام مؤمنین میں سے افضل حضرت ابوبکرؓ ہیں، حدیث مذکور کا یہی مفہوم درست ہے، دیکھئے مفتی شفیعؒ کی کتاب ’’ختم نبوت کامل‘‘ کی ’’حدیث نمبر: ۱۰۳‘‘ میں ہے: ’’عن عکرمة ابن الأکوع - رضی اللہ عنه - عن أبیه مرفوعًا: أبوبکر خیرا لاناس بعدی إلا ان یکون نبی۔ (رواہ ابن عدی والطبرانی في الکبیر وغیرهما)۔ اھـ‘‘ ترجمہ: حضرت عکرمہ بن اکوعؓ اپنے والد سے روایت کرتے ہیں کہ رسول اللہﷺ نے فرمایاہے کہ ابوبکر سوائے نبی کے میرے بعد سب انسانوں سے افضل ہیں۔

مأخَذُ الفَتوی

في شرح الفقه الأکبر: وٲفضل الناس بعد رسول اللہ ۔ صلی اللہ علیہ وسلم ۔ ٲبو بکر الصدیق ۔ رضي اللہ عنه ۔ اھـ
وقال الشارح: والحاصل ٲن ٲفضل الناس بعد الأنبیاء - علیهم الصلاة والسلام - (ٲبو بکر الصدیق ۔ رضي اللہ عنه) اھـ (ص:۶۱)