داڑھی کو برا سمجھنا ,اس کی توہین و تحقیر کرنا اورنجومیوں کو ہاتھ دکھانا

کیا فرماتےہیں علماءِ کرام و مفتیانِ عظام درج ذیل مسائل کے بارے میں کہ:
1. ہمارے علاقے میں اکثر لوگ داڑھی کو بُرا سمجھتے ہیں اور اس کی توہین و تحقیر کرتے ہیں، کہتے ہیں کہ داڑھی رکھنا تو ملّاؤں کا کام ہے، ایسے لوگوں کے بارے میں شریعت کیا کہتی ہے؟
2. اور ان لوگوں کا نجومیوں پر بهى بہت اعتقاد ہو گیا ہے نجومی جو کہے اُسے بلا چوں و چراں مان لیتے ہیں۔ کیا نجومی اس قابل ہے کہ اُسے مستقبل شناس سمجھا جائے اور مستقبل جاننے کے لیے اُسے اپنا ہاتھ دکھا دیا جائے۔
3. اگر کوئی شخص کسی بڑے عالم یا کسی بڑی شخصیت کے ,بوقت ملاقات ہاتھ چومے اور اس کے آگے جھک جائے تو اس طرح کرنا جائز ہے؟

الجوابُ حامِدا ًو مُصلیِّا ً

1. کسی ادنیٰ سے ادنیٰ سنت کو برا سمجھنا یا اس کا مذاق اڑانا درحقیقت اسلام اور حضور اکرم ﷺ کے ساتھ استہزاء ہے جس کے کفر ہونے میں کچھ شبہ نہیں، جب سنت سے استہزاء کفر ہے تو داڑھی تو واجب ہے اور شعائراسلام میں سے ہے، اس کا مذاق اڑانا بطریق اولیٰ کفر ہے، اس لیے مذکور علاقہ کے لوگوں پر اپنے اس ناجائز طرزِعمل سے احتراز اور اب تک کے لاعلمی میں صادر ہونے والے گناہ پر بصدقِ دل توبہ و استغفار لازم ہے۔
2. نجومی کو مذکور نظریہ سے ہاتھ دکھانا جائز نہیں، نبی کریم ﷺ نے اس کی ممانعت فرمائی ہے اور احادیث میں اس پر سخت قسم کی وعیدیں وارد ہوئی ہیں اس سے احتراز لازم ہے۔
3. کسی عالم یا بزرگ کا ہاتھ چومنا اگرچہ جائز ہے، مگر اس کے سامنے اس طرح جھکنا کہ رکوع یا سجدہ کی کیفیت بن جائے درست نہیں۔

مأخَذُ الفَتوی

ففی حاشية ابن عابدين:لما في النهر عن البزازية: لو لم ير السنة حقا كفر لأنه استخفاف.اهـ. (1/ 474)
وفی الدر المختار وحاشية ابن عابدين: وأفاد أن تعلم الزائد على هذا المقدار فيه بأس بل صرح في الفصول بحرمته وهو ما مشى عليه الشارح. (إلی قوله) وإنما زجر عنه من ثلاثة أوجه:
أحدها: أنه مضر بأكثر الخلق، فإنه إذا ألقى إليهم أن هذه الآثار تحدث عقيب سير الكواكب وقع في نفوسهم أنها المؤثرة، وثانيها: أن أحكام النجوم تخمين محض، (إلی قوله) وثالثها: أنه لا فائدة فيه (1/ 44)
وفی رد المحتار: وفی المحیط أنه یکره الانحناء للسطان وغیرہ ۶/۴۸۳)
وفیه أیضاً: وفی الزاهدی الایماء فی السلام إلی قریب الرکوع کالسجود اھ (۶/۴۸۳)
وفی الدر المختار: ولا بأس بتقبیل ید الرجل العالم والمتورع علی سبیل التبرك اھ (۶/۴۸۳) واللہ أعلم بالصواب!