کفریہ گانوں کے گنگنانے سے آدمی کافر ہوجاتا ہے

کیا فرماتے ہیں علمائے کرام اس بارے میں کہ آج کل انڈین اور بعض پاکستانی گانوں میں کفریہ کلمات کی آمیزش کثرت سے پائی جارہی ہے مثلاً (نقل کفر کفر نباشد) ’’حسینوں کو آتے ہیں کیا کیا بہانے خدا بھی نہ جانے تو ہم کیسے جانیں‘‘ اور ’’قدرت نے بنایا ہوگا فرصت سے تجھے میرے یار‘‘۔ یا ان جیسے اور گانے جن میں کفریہ کلمات ہوں، تو عرض یہ ہے کہ ان کے فقط گانے اور سننے سے آدمی کافر ہوجائے گا یا ان کلمات کفریہ کا عقیدہ رکھنے سے کافر ہوگا؟ آج کل یہ بہت عام ہوگئے ہیں اور بسوں وغیرہ میں بھی کثرت سے اس قسم کے کفریہ ریکارڈ لگائے جاتے ہیں جن سے بچنا اکثر ناگزیر ہوتا ہے۔

الجوابُ حامِدا ًو مُصلیِّا ً

مذکور گانے (جن کے ایک شعر کو سائل نے سوال میں ذکر کیا ہے) اللہ تعالیٰ کی شان میں انتہائی درجہ گستاخی پر مبنی ہیں، جوکہ قطعاً ناجائز اور حرام ہیں لہٰذا ان کے سننے سے بہرحال احتراز لازم ہے اور جو شخص اس قسم کے کفریہ گانوں کو اپنے قصد وارادہ سے گائے یا گنگنائے اگرچہ وہ اس کا عقیدہ نہ رکھے تب بھی دائرہ اسلام سے خارج ہوجائے گا، اس لئے کہ کلمہ کفر مذاق کے طور پر بولنے سے بھی آدمی کافر ہوجاتا ہے، لہٰذا صورتِ مسئولہ میں مذکور گانوں سے مکمل احتراز کیاجائے اور جبکہ اس قسم کے گانوں کی وبا تیزی سے پھیل رہی ہے تو اس صورت میں مسلمانوں اور بالخصوص حکومت کی ذمہ داری بنتی ہے کہ ان کے روک تھام کیلئے سعیٔ بلیغ سے کام لے اور جس کے سننے میں اس قسم کے گانے آئیں تو اسے چاہئے کہ اپنی استطاعت کی حد تک اس کو بند کرنے کی کوشش بھی کرے۔

مأخَذُ الفَتوی

وفی الدر المختار: من ہزل بلفظ کفرٍ إرتد وإن لم یعتقد للإستخفاف۔ وفی الشامیۃ: أی تکلم بہ باختیارہ غیر قاصد معناہ (إلی قولہ) قلت ویظہر من ہذا ان ما کان دلیل الإستخفاف یکفر بہ وإن لم یقصد للإستخفاف۔ الخ (ج۴، ص۲۲۲)
وفی الفتاویٰ التاتارخانیۃ: ومن أتی بلفظۃ الکفر مع علمہ أنہا لفظۃ الکفر عن إعتقادہ فقد کفر ولو لم یعتقد أو لم یعلم أنّہا لفظۃ الکفر ولٰکن أتی بہا علی اختیار فقد کفر عند عامۃ العلماء لا یعذر بالجہل۔ (ج۵، ص۴۵۸) ……………………………………………………………………… واﷲ اعلم!