گناہ و ناجائز

محرم کے بغیر ملازمت کے سلسلے میں سفر کرنے کا حکم

فتوی نمبر :
99266
| تاریخ :
2026-09-10
حظر و اباحت / جائز و ناجائز / گناہ و ناجائز

محرم کے بغیر ملازمت کے سلسلے میں سفر کرنے کا حکم

السلام علیکم ورحمۃ اللہ وبرکاتہ!
میں 28 سالہ حنفی خاتون ہوں، میری پہلے شادی ہو چکی ہے اور طلاق ہو چکی ہے۔ میں ملازمت کے سلسلے میں محرم کے بغیر سفر کرنے کے متعلق شرعی رہنمائی چاہتی ہوں۔
میرا ادارہ کئی دنوں پر مشتمل ایک کمپنی سمٹ منعقد کر رہا ہے، جس میں شرکت کے لیے مجھے ہوائی جہاز کے ذریعے سفر کرنا ہوگا۔ یہ سفر پیشہ ورانہ مقصد کے لیے ہے، میرے لیے مناسب رہائش کا انتظام ہوگا، اور میں اپنے ساتھ کام کرنے والے دیگر ساتھیوں کے ہمراہ اس میں شرکت کروں گی۔
حال ہی میں میرے گھر والوں نے حنفی مذہب کا یہ حکم میرے سامنے رکھا ہے کہ عورت کو محرم کے بغیر سفر نہیں کرنا چاہیے۔ میرے والد مالی مجبوریوں کی وجہ سے میرے ساتھ سفر نہیں کر سکتے۔ میرا بالغ بھائی، جو میرا محرم ہے، میرے ساتھ جانے کے لیے دستیاب اور آمادہ ہے۔ تاہم، مجھے اسے اپنے پیشہ ورانہ ماحول میں ساتھ لے جانے کے حوالے سے شدید تحفظات ہیں۔
میری کمپنی کا یہ سمٹ صرف ملازمین کے لیے مخصوص ہے، کیونکہ اس میں داخلی اور ممکنہ طور پر خفیہ معلومات زیرِ بحث آئیں گی۔ میرے بھائی نے کہا ہے کہ وہ میری تقریبات میں شرکت کرنا اور میرے ساتھیوں سے میل جول اور نیٹ ورکنگ کرنا چاہتا ہے۔ جب میں نے مہمانوں پر عائد پابندی کا ذکر کیا تو اس نے بتایا کہ وہ اس سے پہلے بھی بغیر اجازت سمٹس اور تقریبات میں خفیہ طور پر داخل ہو چکا ہے۔
مجھے اس بات کا بھی خدشہ ہے کہ وہ میرے ساتھیوں کے سامنے میرے بارے میں ایسی باتیں کہہ سکتا ہے جو میرے لیے نقصان دہ ہوں۔ وہ ہمارے قریبی خاندان سے باہر کے لوگوں کے سامنے میرے متعلق بارہا ایسے تبصرے کر چکا ہے جن سے میرے بارے میں منفی تاثر پیدا ہو سکتا ہے۔ اسی طرح وہ بعض ایسے مذاق یا تبصرے بھی کر چکا ہے جنہیں میں نسلی اعتبار سے نامناسب سمجھتی ہوں؛ مثلاً اس نے بظاہر صرف رنگ و نسل کی بنیاد پر ایک سیاہ فام شخص کا موازنہ ایک سیاہ فام گلوکار سے کیا، اور اعتراض کیے جانے کے باوجود اپنی بات پر قائم رہا۔ اس نے یہ بھی کہا ہے کہ ڈپریشن نام کی کوئی حقیقی چیز نہیں اور لوگ اسے محض مظلوم بننے کے بہانے کے طور پر استعمال کرتے ہیں۔ اسی طرح اس نے خواتین اور نسوانیت (Feminism) کے حوالے سے اشتعال انگیز تبصرے بھی کیے ہیں۔ اس نوعیت کی باتیں میرے کام کی جگہ پر انتہائی نامناسب ہوں گی، اور مجھے خدشہ ہے کہ اگر اس نے میرے ساتھیوں کے سامنے بھی ایسی باتیں کیں تو اس سے میری پیشہ ورانہ ساکھ متاثر ہو سکتی ہے، بلکہ ممکن ہے کہ میری ملازمت بھی خطرے میں پڑ جائے۔
میں سمجھتی ہوں کہ حنفی مذہب کا وہ معتمد قول جس پر عمل کیا جاتا ہے، سفر کے لیے محرم کی شرط عائد کرتا ہے۔ تاہم، میں نے پڑھا ہے کہ بعض حنفی علماء مخصوص حالات میں کسی دوسرے سنی فقہی مذہب کے ایسے معتبر قول پر عمل کرنے کی اجازت دیتے ہیں جس کے مطابق محرم کے بغیر محفوظ سفر کرنا جائز ہو، جب حقیقی ضرورت یا منفعت موجود ہو؛ اور اس میں ملازمت یا پیشہ ورانہ سفر بھی ممکنہ طور پر شامل ہو سکتا ہے۔
کیا میرے حالات میں میرے لیے اس رخصت پر شرعاً عمل کرنا جائز ہوگا، باوجود اس کے کہ میرا بھائی بطورِ محرم اصولاً میرے ساتھ جانے کے لیے دستیاب ہے؟ کیا کام کی جگہ کی رازداری، پیشہ ورانہ حدود، میری ساکھ کو نقصان پہنچنے کا اندیشہ، اور میری ملازمت کو ممکنہ نقصان جیسے خدشات اس بات کا تعین کرتے وقت معتبر سمجھے جا سکتے ہیں کہ آیا یہ رخصت میرے معاملے میں لاگو ہوتی ہے یا نہیں؟
میں اپنی نیت کے بارے میں بھی واضح رہنا چاہتی ہوں۔ میرے گھر والوں کی طرف سے محرم کا مسئلہ اٹھائے جانے سے پہلے میں نے اس سفر کو اسلامی فقہ کے نقطۂ نظر سے سوچا ہی نہیں تھا، بلکہ محض یہ ارادہ کیا تھا کہ میں اکیلے سفر کروں گی۔ میں اپنے خاندان سے آزادی چاہتی ہوں، اور اس رخصت پر عمل کرنے کی میری خواہش کی ایک وجہ یہ بھی ہے کہ میں نہیں چاہتی کہ میرے خاندان کا کوئی فرد میرے ساتھ سفر کرے۔ مجھے اس بات کا خدشہ ہے کہ اس طرح شاید میں محض اس لیے کسی آسان قول کو اختیار کرنا چاہ رہی ہوں کہ اس سے وہی نتیجہ حاصل ہو جائے جو میں پہلے ہی چاہتی تھی۔
کیا سفر میں خود مختاری کی میری یہ سابقہ خواہش اس بات پر اثر انداز ہوتی ہے کہ آیا میں شرعاً اس رخصت سے فائدہ اٹھا سکتی ہوں یا نہیں؟ اگر یہ رخصت میرے معاملے میں شرعاً قابلِ اطلاق ہو، تو کیا اس کے باوجود میرے لیے اکیلے سفر کرنا گناہ ہوگا، کیونکہ میں عام طور پر حنفی مذہب کی پیروی کرتی ہوں؟
آخر میں، اگر یہ فرض کر لیا جائے کہ خود سفر کرنا شرعاً جائز ہے، تو کیا 28 سالہ، مالی طور پر خود کفیل، پہلے شادی شدہ اور مطلقہ بیٹی کے لیے ملازمت کے سلسلے میں سفر کرنے کے لیے اپنے والد یا والدین کی اجازت لینا ضروری ہے؟ اگر والدین کسی ایسے سفر کی مخالفت کریں جو بذاتِ خود شرعاً جائز ہو، تو کیا ان کی مخالفت کے باوجود سفر کرنا والدین کی نافرمانی کے زمرے میں آ کر گناہ ہوگا؟
میں کسی مخصوص جواب کی خواہش نہیں رکھتی۔ میں حقیقتاً یہ جاننا چاہتی ہوں کہ شرعاً مجھے کیا کرنا چاہیے، خواہ جواب یہ ہو کہ میرے لیے محرم کے ساتھ سفر کرنا ہی ضروری ہے۔
آپ کے وقت اور رہنمائی کا بہت شکریہ۔
جزاکم اللہ خیراً۔

الجوابُ حامِدا ًو مُصلیِّا ً

واضح ہو کہ فقہِ حنفی میں عورت کے لیے شرعی مسافت کے بقدر یا اس سے زائد مسافت کا سفر شوہر یا محرم کے بغیر جائز نہیں، خواہ بذریعۂ ہوائی جہاز سفر ہو اور عورت عمر رسیدہ ہی کیوں نہ ہو۔ نیز جائز امور میں والدین کی اطاعت لازم و ضروری ہے، چنانچہ والدین کی اجازت کے بغیر اولاد، خصوصاً بیٹی، کے لیے سفر کرنا جائز نہیں۔لہٰذا صورتِ مسئولہ میں جب سائلہ کا محرم بھائی موجود ہے اور وہ اس کے ساتھ جانے پر آمادہ بھی ہے، تو محض ملازمت یا پیشہ ورانہ سفر، اپنی آزادی کی خواہش، یا بھائی کے نامناسب رویے کی وجہ سے ساکھ یا ملازمت کو نقصان پہنچنے کے اندیشے کی بنا پر محرم کے بغیر سفر کرنے کی شرعاً اجازت نہ ہوگی، خصوصاً جبکہ والدین کی طرف سے بھی اس کی اجازت نہ ہو تو یہ سفر محرم اور والدین کی اجازت کے بغیر گناہ کا باعث ہوگا اور سائلہ گناہ گار ہوگی۔اس لیے سائلہ کو چاہیے کہ اپنے بھائی کو مذکورہ خدشات سے آگاہ کرکے مناسب تدبیر اختیار کرے، مثلاً اس سے کمپنی کے ضوابط کی پابندی کرنے اور سائلہ کے پیشہ ورانہ معاملات میں مداخلت نہ کرنے کا تقاضا کرے، یا اسے سیشن میں شرکت کی اجازت ہی نہ دی جائے۔ نیز محض اپنی خواہش کے مطابق نتیجہ حاصل کرنے کے لیے دوسرے فقہی مذہب کی رخصت پر عمل کرنا بھی شرعاً درست نہیں۔لہٰذا سائلہ کے لیے محرم کے ساتھ سفر کرنا لازم ہے، اور چونکہ والدین بھی اسی شرعی حکم کی پابندی کے لیے سائلہ کو بغیر محرم سفر کرنے سے منع کر رہے ہیں، اس لیے ان کی مخالفت کرنا بھی سائلہ کے لیے شرعاً جائز نہیں، جس سے احتراز لازم ہے۔

مأخَذُ الفَتوی

کما فی تفسیر القرطبی: الرابعة- عقوق الوالدين: مخالفتهما في أغراضهما الجائزة لهما، كما أن برهما موافقتهما على أغراضهما. (سورۃ الاسراء،ج10،ص238،ط؛دارالجتب المصریۃ)
وفی بحوث في قضايا فقهية معاصرة: سفر المرأة بغير محرم:أخرج مسلم عن أبي سعيد الخدري رضي الله عنه، قال: قال رسول الله صلى الله عليه وسلم: ((لا تسافر المرأة فوق ثلاث إلا ومعها زوج أو ذو رحم محرم منها)) هذا الحكم الصريح قد أخذ به جمهور الفقهاء، حتى إنهم لم يجوزوا لها أن تسافر بدون محرم لضرورة الحج، وأن الدراسة والعمل في البلاد الأجنبية ليس من ضرورة النساء المسلمات في شيء، إن الشريعة لم تأذن للمرأة بالخروج من دارها إلا لحاجة ملحة، وقد ألزم أباها وزوجها بأن يكفل لها بجميع حاجاتها المالية، فليس لها أن تسافر بغير محرم لمثل هذه الحوائج.
أما إذا كانت المرأة ليس لها زوج أو أب، أو غيرهما من أقاربهاالذين يتكفلون لها بالمعيشة، وليس عندها من المال ما يسد حاجتها، فحينئذ يجوز لها أن تخرج للاكتساب بقدر الضرورة، ملتزمة بأحكام الحجاب، فيكفي لها في مثل هذه الحال أن تكتسب في وطنها، ولا حاجة لها إلى السفر إلى البلاد الأجنبية، ولو لم تجد بدا من السفر في وطنها من بلد إلى آخر، ولم تجد أحدا من محارمها، ففي مثل هذه الحالة فقط يسع لها أن تأخذ بمذهب مالك، والشافعي، حيث جوزوا لها السفر مع النساء المسلمات الثقات. (1/339)

واللہ تعالی اعلم بالصواب
جنید الرحمن سکھروی عُفی عنه
دار الافتاء جامعه بنوریه عالمیه
فتوی نمبر 99266کی تصدیق کریں
0     117
Related Fatawa متعلقه فتاوی
Related Topics متعلقه موضوعات