شرکتِ فاسدہ کی ایک صورت کا حکم

کیا فرماتے ہیں علماءِ کرام و مفتیانِ عظام اس مسئلہ کے بارے میں کہ ایک کفیل عامل کو پانچ لاکھ( 500000) نقد یا اتنی رقم کے بقدر مال یعنی سامان وغیرہ دیدے، اور کفیل اس نقدی یا سامان میں سے اپنے لئے سالانہ متعین منافع مثلاً 80,000 ہزار طے کرے ،اور ساتھ ساتھ یہ بھی شرط لگا دے کہ عامل جب بھی کام چھوڑے گا ،تو کفیل کو وہی نقد رقم یا اس کے بعد یا اس کے بقدر مالیت سپرد کرنا پڑے گا ،جبکہ مثلاً دوکان کا کرایہ بجلی بل وغیرہ اور کام کرنے والوں کی مزدوری عامل پر ہی لاگو ں ہونگے ،اور کفیل کا تعلق فقط اپنے متعین کردہ منافع کے ساتھ ہی ہوگا، براہِ کرم شریعت کی رو سے اس کاروبار کا حکم بیان کر دیجئے کہ آیا یہ صورت جائز ہے یا نہیں ؟ اگر بالفرض جائز نہیں ،تو جواز کی کیا صورت بن سکتی ہے؟

الجوابُ حامِدا ًو مُصلیِّا ً

سوال میں مذکور شرائط کے ساتھ کاروبار کرنا شرعاً جائز نہیں، جس سے احتراز لازم ہے۔ البتہ اس کا درست طریقہ ممکن ہے، اور وہ یہ کہ رب المال (مالک) مضارب (عامل) کو پیسے دے کر یہ کہے کہ اس سے کاروبار کرو ،جتنا نفع ہوگا ،وہ میرے اور آپ کے درمیان اتنے فیصد یا حصہ مثلاً آدھوں آدھ یا تہائی وغیرہ کے حساب سے تقسیم ہوگا ،اور کاروبار سے متعلق جتنے بھی اخراجات ہونگے ،وہ مضاربت کے مال سے دیے جائیں گے، اور نقصان کی صورت میں حاصل شدہ کل نفع سے تلافی کی جائے گی۔

مأخَذُ الفَتوی

كما في الفتاوى الهندية: بأن يقول رب المال خذ هذا المال مضاربة على أن ما رزق الله أو أطعم الله تعالى منه من ربح فهو بيننا على كذا من نصف أو ربع أو ثلث أو غير ذلك اھ (4/ 285)۔
وفيها ایضاً: وكذلك لو كان للمضارب دواب يحمل عليها متاع المضاربة إلى مصر من الأمصار كان علفها على المضاربة ما دامت في عملها كذا في المبسوط اھ (4/ 313)۔
وفي الدر المختار: (وما هلك من مال المضاربة يصرف إلى الربح) ؛ لأنه تبع (فإن زاد الهالك على الربح لم يضمن) ولو فاسدةمن عملہ؛ لأنه أمين اھ (5/ 656)۔