سرمایہ دار کا، کاروبار کے اختتام پر سامان فروخت کرکے سرمایہ وصول کرنے کی شرط لگانا

کیا فرماتے ہیں مفتیانِ کرام اس مسئلے کے بارے میں کہ زید نے عمرو کو کچھ نقد رقم دے کر کہا کہ آپ ان پیسوں سے کاروبار کرلیں اور یہ بھی کہا کہ منافع دونوں کے درمیان ہوگا ،عمر ونے ان پیسوں سے ہوٹل کا کاروبار شروع کیا ، زید کا یہ بھی کہنا ہے کہ کاروبار کے اختتام پر سارا سامان بیچ کر پیسے سب میرے ہونگے، آیا مذکورہ صورت میں زید پر زکوۃ ادا کرنا فرض ہے یا نہیں؟ اور اس طرح کاروبار کرنا کیسا ہیں؟شکریہ

الجوابُ حامِدا ًو مُصلیِّا ً

سوال میں ذکر کردہ تفصیل کے مطابق اگر کا روبار کیلئے ساری رقم زید نے فراہم کی ہو ،عمرو کی طرف سے اس میں کوئی رقم شامل نہ ہو اور پھر عمرو نے اس رقم سے ہوٹل کا کا م شروع کیا ہو تو ایسی صورت میں زید کی طرف سے فراہم کردہ رقم سے ہوٹل کیلئے جو کچھ ساز وسامان وغیرہ خریدا گیا ہے وہ زید ہی کی ملکیت ہوگا، چنانچہ کاروبار کے اختتام پر زید کیلئے سامان فروخت کر کے حاصل شدہ رقم وصول کرنے کی شرط لگانا بھی جائز اور درست ہوگا، تاہم ہوٹل میں موجود سامان (ٹیبل ،کرسیاں، برتن وغیرہ )چونکہ مالِ تجارت نہیں اس لئے زید کے ذمہ اس سامان کی زکوۃ لازم نہ ہوگی ،البتہ کاروبار سے حاصل شدہ رقم میں سے زید اور عمرو کا جتنا حصہ ہے وہ اگر بقدر نصاب ہو یا دونوں میں سے ہر ایک پہلے سے صاحب نصاب ہو تو ایسی صورت میں ہر ایک کے ذمہ اپنے اپنے حصے کی زکوۃ لازم ہوگی اسی طرح کاروبار کے اختتام پرسامان پر فروخت ہونے کے بعد حاصل شدہ رقم پر زید کے ذمہ دیگر اموالِ زکوۃ کے ساتھ زکوۃ کی ادائیگی لازم ہوگی ۔

مأخَذُ الفَتوی

فی الدر المختار : و شرعا (عقد شركة في الربح بمال من جانب)رب المال(وعمل من جانب)المضارب(5/645)۔
و فیہ ایضاً : (و سببه) أي سبب افتراضها (ملك نصاب حولي) نسبة للحول لحولانه عليه (تام) بالرفع صفة ملك ، خرج مال المكاتب (2/259)۔