مکان میں کسی کو شریک کرنے کا طریقہ کار

کیافرماتے ہیں مفتیانِ کرام اس مسئلہ کے بارے میں کہ میں مسمیٰ "ملک زادہ " نے ایک مکا ن چالیس یاپچاس لاکھ روپے پر لیاہے ،اب میں چھ لاکھ روپے دوسرے شخص "سردار "سے لیتا ہو ں اس کو اس مکان میں شریک کررہاہوں، وہ مجھے اس شرط پر چھ لاکھ روپے دے رہا ہے، کہ میں اس مکان میں چالیس یا پچاس گز کے تناسب کے اعتبار سے اس مکا ن میں شریک ہونگا ،جبکہ اس میں میرا نقصان ہے ،اب مجھے ایسا طریقہ کار بتائیں کہ میں اس سے چھ لاکھ روپے کس طرح پرلوں،تاکہ وہ میرےساتھ اس مکان میں شریک ہوسکے؟

الجوابُ حامِدا ًو مُصلیِّا ً

سوال میں درج کردہ تفصیل کے مطابق سائل اگر مذکور شخص ( مسمی سردار )سے چھ لاکھ روپے لیکر پورے مکان میں اسے شریک اور حصہ دار بنائے تو ایسی صورت میں مذکور شخص اپنی رقم کے تناسب سے پورے مکان میں شریک اور حصہ دار ہو گا ، پھرمکان کی قیمت بڑھنے یا گھٹنے سے وہ اپنی رقم کے تناسب سے شرعاً منافع کا مستحق اور نقصان کا ذمہ دار ہو گا، البتہ اگر سائل اسے پورے مکان میں شریک کرنے کے بجائے مکان کے کسی حصے (کسی ایک کمرے وغیرہ) کی مالیت لگا کر اسے اسں مخصوص حصے میں شریک کر دے تو ایسی صورت میں مذکور شخص پورے مکان کے بجائے اس مخصوص حصے میں اپنی رقم کے تناسب سے شریک اور حصہ دار ہوگا، اور پھر اس کا نفع و نقصان پورے مکان کے بجائے فقط اس مخصوص حصے تک محدود ہوگا۔

مأخَذُ الفَتوی

کما فی المحیط : و من اشترى شيئا و أشرك فيه آخر قبل القبض لم يصح ؛ لأن الاشتراك في المشترى تمليك بعوض ؛ لأن مطلق الشركة اقتضت المساواة مطلقا في النفع و ھو ملك المبيع و في الضرّ و هو لزوم الثمن كالمعاوضة فيكون الاشتراك بيعًا معنى فلم يصح قبل القبض ، و إن اشترك فيه بعد القبض فهو بينهما؛ لأن مطلق الشركة مقتضية للمساواة ما لم يقيد بالتفاضل الخ (6/122)۔