والد کا اپنی زندگی میں جائیداد کو تقسیم کرنا

میرے والد اپنی جائیداد کو اپنی زندگی میں تقسیم کرنا چاہتے ہیں، ہم تین بھائی اور ایک بہن ہیں، بھائی سب کے سب والد صاحب کے ساتھ کاروبار کر رہے ہیں ، والد صاحب نے آدھی جائیداد بیٹوں کے ساتھ کاروبار میں شراکت کے بعد خریدی ہے ۔ اب پوچھنا یہ ہیکہ کیا بہن کو تمام جائیداد میں حصہ ملے گا یا صرف اس جائیداد میں جو والد صاحب نے بیٹوں کی شرکت سے پہلے لی تھی۔

الجوابُ حامِدا ًو مُصلیِّا ً

سائل اور اس کے دیگر بھائیوں نے اگر والد صاحب کے کاروبار میں والد ہی کے سرمایہ میں ان کے ساتھ فقط کام کیا ہو ، اور والد کا بنایا ہوا کاروبار چلایا ہو تو یہ سائل اور اس کے دیگر بھائیوں کی طرف سے اپنے والد صاحب کے ساتھ تعاون ہوا ہے ، اس تعاون کی وجہ سے کاروبار میں ان کی پارٹنر شپ ثابت نہیں ہوئی، بلکہ یہ کاروبار اور اس سے بنائی ہوئی دیگر پراپرٹی والد ہی کی ملک تصور ہو گی ، اب اگر سائل کے والد اپنی زندگی میں جائیداد بغیر کسی جبر واکراہ کے اپنی رضامندی سے اپنی اولاد میں تقسیم کرنا چاہیں تو اس کا بہتر اور مستحب طریقہ یہ ہے کہ سائل کے والد ایک محتاط اندازہ کے موافق اپنی بقیہ زندگی کے لیے جو کچھ رکھنا چاہے وہ رکھ کر بقیہ رقم اپنی اولاد کے درمیان برابر حصوں میں تقسیم کر کے ہر فرد کو اس کے حصے پر باضابطہ مالکانہ قبضہ بھی دیدے تا کہ یہ ہبہ شرعاً بھی درست اور تام ہو جائے، پھر بہتر یہ ہے کہ اس ہبہ اور اعطاء میں سب کو برابر اور یکساں رکھے کہ سب ہی اس کی اولاد ہیں ، کسی کو زیادہ کسی کو کم نہ دے ، البتہ کسی کی خدمت گذاری، محتاجی یا دین داری و غیر ہ کی بناء پر اسے دوسرے ورثاء کے مقابلہ میں کچھ زیادہ دینا چاہے تو اس کا اسے اختیار ہے، مگر بلاوجہِ شرعی کسی وارث کو اپنی جائیداد سے محروم نہ کرے کہ یہ گناہ کی بات ہے۔

مأخَذُ الفَتوی

كما في الفتاوى البزازية: وذكر شيخ الإسلام جلال الدين في أب وابن اكتسبا ولم يكن لهما مال فاجتمع لهما بالكسب أموال الكل للأب لأن الابن إذا كان في عياله فهو معين له في كل ما يكتسب ألا يرى أنه لو غرس شجرة فهي للأب اھ (6/ 149)
و في العقود الدرية في تنقيح الفتاوى الحامدية: (سئل) في ابن كبير له عيال وكسب مات أبوه عنه وعن ورثة يدعون أن ما حصله من كسبه مخلف عن أبيهم ويريدون إدخاله في التركة فهل حيث كان له كسب مستقل يختص بما أنشأه من كسب وليس للورثة مقاسمته في ذلك ولا إدخاله في التركة؟ (الجواب) : نعم. (2/ 17)