کافر ہوکیا؟کے جواب میں "ہاں "کہنے کا حکم

السلام علیکم، جناب مفتی صاحب!
میری بیوی کو میں نے دوسری شادی کے بارے میں کہا تو بیوی نے کہا کہ نہیں ،
میں نے کہا کہ دینی مسئلہ نہیں مانتی ، تو جواب دیا کہ نہیں
تو میرے منہ سے نکل گیا کہ کافر ہو کیا ؟
تو اسنے جواب دیا کہ ہا ں ۔
اب سوال یہ ہے کہ ان لفظوں سے نکاح پر کیا اثر پڑےگا اور کیا وہ مسلمان رہی یا نہیں ؟؟؟

الجوابُ حامِدا ًو مُصلیِّا ً

صورت مسئولہ میں شوہر کے ساتھ سوال و جواب کے دوران بیوی کا یہ کہنا کہ "ہاں میں کافر ہوں" انتہائی نا مناسب اور سنگین کلمہ ہے، تاہم چونکہ اس نے مذکور کلمہ احکام شرعیہ سے ناواقفیت کی بنیاد پر کہا ہے اور مقصود اسلام کا انکار نہیں ، چنانچہ اس کی وجہ سے اگرچہ اس پر کفر کا حکم نہیں لگے گا ، تاہم اس پر ندامت کے ساتھ بصدق دل توبہ و استغفار اور آئندہ کے لیے ا س قسم کے کلمات ادا کرنے سے احتراز لازم ہے ، جبکہ شوہر کو بھی چاہیے کہ آئندہ اس طرح کی باتیں کرنے سے اجتناب کرے۔

مأخَذُ الفَتوی

کما في التاترخانية: وفي الينابيع: قال أبو حنيفة رضي الله عنه : لا يكون الكفر كفراً حتى يعقد عليه القلب(كتاب أحكام المرتدين، الفصل الأول في اجراء كلمة الكفر، ج: ٧، ص: ٢٨٢، مط: رشيدية)
وفيه أيضا: وما كان خطأ من الألفاظ ولا توجب الكفر فقائله مؤمن على حاله ولا يؤمر بتجديد النكاح ولكن يؤمر بالاستغفار والرجوع عن ذلك والله اعلم (كتاب أحكام المرتدين، الفصل الأول في اجراء كلمة الكفر، ج: ٧، ص: ٢٨٤، مط: رشيدية)
وفي البحر الرائق: والحاصل أن من تكلم بكلمة الكفر هازلا أو لاعبا كفر عند الكل ولا اعتبار باعتقاده كما صرح به قاضي خان في فتاويه ‌ومن ‌تكلم ‌بها مخطئا أو مكرها لا يكفر عند الكل.(باب أحكام المرتدين، ج: ٥، ص: ١٣٤، مط: دار الكتاب الأسلامي)