سرمایہ انویسمنٹ میں سرمایہ مالک کا اپنے لئے تمام منافع کی شرط لگانے کا حکم

السلام علیکم
میرا ایک سوال ہے، یہاں پر ایک بندے کا کار شوروم ہے، میری اس سے انویسٹ منٹ کی بات ہوئی کہ میں آپکو کچھ پیسے دیتا ہوں ، آپ اسکو اپنے کاروبار میں لگائیں، اس سے جتنا منافع یا نقصان ہو وہ میرا، عام طور پہ وہ موٹر سائیکل یا کار اقساط پہ دیتا ہے، میں نے کوئی رقم فکس نہیں کی، میں نے کہا مجھے یہ رقم 3 ماہ بعد واپس دینا میں نے اسکو 771،000 روپے دیے ، 2 دن بعد اس نے مجھے کھاتا بنا کر بھیجا کہ آپ کی رقم میں نے ایک کار میں شامل کی ہے،میں آپکو کل 10 لاکھ 3 ماہ 10 دن بعد دونگا، تو میرا سوال یہ تھا کہ یہ جو منافع وہ مجھے دیگا وہ وہ جائز ہے میرے لئے؟ میں نے اس سے کوئی رقم فکس نہیں کی اس نے اپنی مرضی سے دی۔

الجوابُ حامِدا ًو مُصلیِّا ً

صورتِ مسئولہ میں اگر سائل کا مذکور بندے کو رقم دے کر یہ معاہدہ ہوا ہو کہ وہ اس کو اپنے چلتے کاروبار میں لگائے گا، اور سائل کی رقم سے جو گاڑی وغیرہ خرید کر بیچی جائے گی اس سے جتنا نفع ہو گا وہ صرف سائل کا ہو گا ،(جیسا کہ سوال میں مذکور ہے) تو ان کے درمیان یہ معاملہ” عقدِ بضاعت“ کا ہوا ہے اور یہ شرعاً جائز ہے ،لہذا مذکور شخص نے اگر یہ رقم کار خریدنے میں شامل کی ہو ، اور قسطوں پر ادھار بیچنے کی بنیاد پر اس کے متوقع منافع سامنے آئے ہوں ، تو ایسی صورت میں سائل کا ان منافع کو لینا اور اپنے استعمال میں لانا ہر دو صورت جائز اور درست ہے ،شرعا ًاس میں کوئی مضائقہ نہیں ۔

مأخَذُ الفَتوی

کما فی الدر المختار: ( ودفع المال إلی الآخر مع شرط الربح کلہ (للمالک بضاعۃ ) فیکون و کیلا متبرعا الخ ( کتاب المضاربۃ ج:5،ص:647،ط:سعید)۔