مضاربت میں آئے ہوئے قرضے کا حکم

محترم مفتی صاحب! اگر مضاربت ختم ہو جائے تو اس کے بعد جو قرضے (پورے) باقی ہوں، وہ کون وصول کرے گا؟ مضارب یا رب المال؟ اور جو مال (سامان) باقی رہ جائے، اس کو فروخت کرنے کی ذمہ داری کس پر ہوگی؟ مضارب پر یا رب المال پر؟

الجوابُ حامِدا ًو مُصلیِّا ً

واضح ہو کہ عقد مضاربت ختم کرنے کےلئے مال مضاربت کا اس کیفیت میں ہونا ضروری ہے جس کیفیت میں مضارب کے حوالہ کیا گیا تھا، ورنہ رب المال کےلئے مضارب کی اجازت کے بغیر یکطرفہ طور پر عقد مضاربت ختم کرنا اور اسے مزید لین دین کرنے سے روکنے کا اختیار نہیں ہوگا۔ لہذا اگر مضاربت کے معاملہ میں کوئی قرض اور مال باقی ہو تو قرض کو وصول کرنا اور مال کو کیش کی صورت میں تبدیل کرنا مضارب کی ذمہ داری ہوگی، إلا یہ کہ رب المال اپنی مرضی سے قرض کی وصولی اور بقیہ مال کی فروختگی خود اپنے ذمہ یا کسی دوسرے کے ذمہ منتقل کرکے مضارب کو اس ذمہ داری سے آزاد کردے، تو اس میں شرعا بھی کوئی حرج نہیں، لیکن حساب کتاب کرتے وقت نفع ونقصان میں ان بقیہ اموال کو شامل کرنا ضروری ہوگا۔

مأخَذُ الفَتوی

وفي بدائع الصنائع: واما صفة هذا العقد فهو انه عقد غير لازم، ولكل واحد منهما اعني رب المال والمضارب الفسخ، لكن عند وجود شرطه، وهو علم صاحبه لما ذكرنا في كتاب الشركة، ويشترط ايضا ان يكون راس المال عينا وقت الفسخ دراهم او دنانير، حتى لو نهى رب المال المضارب عن التصرف، وراس المال عروض وقت النهي، لم يصح نهيه وله ان يبيعها؛ لانه يحتاج الى بيعها بالدراهم والدنانير؛ ليظهر الربح، فكان النهي والفسخ ابطالا لحقه في التصرف، فلا يملك ذلك، وان كان راس المال دراهم او دنانير وقت الفسخ والنهي، صح الفسخ والنهي، لكن له ان يصرف الدراهم الى الدنانير، والدنانير الى الدراهم؛ لان ذلك لا يعد بيعا لاتحادهما في الثمنية. اھ (فصل في صفة عقد المضاربة، 6/109، دار الكتب العلمية)