سوال میں مذکور صورت کا حکم

جناب محترم ایک مسئلے کا حل قرآن وسنت کی روشنی میں مرحمت فرمائیں کہ اللہ تعالی آپ کو جزائے خیر عطا فرمائے۔
مسئلہ: ایک شخص ایک اشتہار دیتا ہے، جس میں لکھا ہے کہ آئیں ہم آپ کو کاروبار کیلئے تین لاکھ روپے دیتے ہیں، جس کی صورت درج ذیل ہے: یعنی ساٹھ آدمیوں کی ایک کمیٹی بنائی جاتی ہے، جس میں ایک چیئر مین ہوتا ہے، ہر شخص مہینے کی شروع کی مقررہ تاریخ میں چیئر مین کے پاس پانچ ہزار روپے جمع کرتا ہے، جو کہ پہلے مہینے کی جمع شدہ رقم جو تین لاکھ بنتی ہے، چیئر مین خود لے لیتا ہے، دوسرے مہینے دوبارہ مقررہ تاریخ میں یہ تمام ساٹھ افراد پانچ پانچ ہزار روپے چیئرمین کے پاس جمع کرتے ہیں ،جو کہ تین لاکھ روپے بنتی ہے، وہاں پر تمام کمیٹی ممبر ان جمع ہوتے ہیں، اور پھر ان تین لاکھ روپوں پر بولی لگائی جاتی ہے، جو شخص سب سے زیادہ بولی دے گا ،چیئر مین یہ تین لاکھ روپے جس میں سے دس ہزار روپے ضروری اخراجات کے کاٹ کر اس شخص کو دے دیگا ،یہ عمل (45) مہینے تک اسی طرح پر کیا جاتا ہے، اور زیادہ کر دینے والے کو دس ہزار روپے کاٹ کر دولاکھ نوے ہزار روپے دے دیے جاتے ہیں، یہ تمام بولی دہندہ اصل رقم یعنی پانچ ہزار روپے مہینے کے علاوہ بولی کی زیادہ رقم وصولی کے بعد قسطوں کی صورت میں ادا کرتا ہے ،آخری پندرہ آدمیوں کو بغیر بولی لگائے رقم جمع کر کے بذریعہ قرعہ اندازی ایک لاکھ پچاس ہزار روپے ادا کی جاتی ہے یہ کمیٹی ساٹھ مہینوں میں مکمل ہو جاتی ہے، اس کمیٹی کو ایک کاروباری موقع کہا جاتا ہے زیادہ بولی لگنے کی وجہ سے اس میں چیئرمین کو بھی بچت ہو جاتی ہے، جسے وہ اپنی بھاگ دوڑ اور محنت کا صلہ سمجھتا ہے اور دفتری ٹیلی فون اور مہمانی اخراجات پر بھی صرف کرتا ہے۔

الجوابُ حامِدا ًو مُصلیِّا ً

سوال میں مذکور’’ کا روباری موقع ‘‘ جُوئے اور قمار پر مبنی ہونے کی بناء پر نا جائز اور حرام ہے، اس طریق کار میں شرکت کرنے سے احتراز لازم ہے، البتہ اسے جائز طریقے پر بھی کیا جا سکتا ہے، اس طور پر کہ کمیٹی کے ہر فرد کو اُس کی آخر وقت تک جمع شدہ رقم کے برابر یکمشت دی جائے، پھر قرعہ اندازی سے اگر کسی کو پہلے اور کسی کو بعد میں دیدی جائے ،تو اس میں کچھ حرج نہیں، بلکہ جائز اور درست ہے ،جو باہمی تعاون کی ایک مباح صورت ہے۔

مأخَذُ الفَتوی

قوله تعالی ﴿وَلَا تَعَاوَنُوا عَلَى الْإِثْمِ وَالْعُدْوَانِ﴾ (المائدة: 2)-