دو بھائیوں کا اکھٹا جائیداد خریدنے کی صورت میں تقسیم کا طریقہ کار

کیا فرماتے ہیں علماءِ کرام اس مسئلہ کے بارے میں کہ معراج اور عمر دو بھائی ہیں، 2001 ء میں معراج اپنی فیملی کے ساتھ صوبہ سرحد سے کراچی آیا، اور ساتھ عمر بھی آیا، اس وقت معراج کراچی میں نوکری کرتا تھا، اس کی تنخواہ بارہ ہزار روپے تھی، اور عمر پہلے فارغ اور بعد میں چو بیس سو روپے تنخواہ پر لگا، اس کے بعد دونوں بھائی اکٹھے رہے، اور خرچہ اکٹھا چل رہا تھا، بعد میں عمر کی تنخواہ چھ ہزار ہوگئی، اور معراج کی اٹھارہ ہزار ۔
2005ء میں عمر کی شادی مشتر کہ خرچے پر کی گئی،آمدن اور خرچے کا سارا حساب معراج کے پاس ہو تا تھا، بعد میں مکان پلاٹ وغیرہ خریدے۔
اور اس وقت بھی معراج کی تنخواہ عمر کی تنخواہ کے ڈبل سے زیادہ ہے، شروع دن سے لے کر آج تک معراج کی تنخواہ عمر کی تنخواہ سے ڈبل یا زیادہ رہتی ہے، خرچے خوراک کے اعتبار سے معراج کی فیملی چھ اور عمر کی فیملی پانچ افراد پر مشتمل ہے۔ اس وقت مکان پلاٹ اور نقد رقم موجود ہے، اگر وہ علیحدہ ہونا چاہتے ہوں تو شریعت میں ان دونوں بھائیوں کی تقسیم کا کیا حکم ہے؟

الجوابُ حامِدا ًو مُصلیِّا ً

مذکور جائیدادیں خریدتے وقت اگر کسی قسم کی کوئی وضاحت و صراحت نہیں کی گئی تھی کہ ہر ایک اپنی رقم کے بقدر حصہ دار ہو گا ،تو اس صورت میں برابری کی بنیاد پر تقسیم ہوگی ۔

مأخَذُ الفَتوی

كما في الفقه الإسلامي وأدلته: شركة الأملاك: هي أن يتملك شخصان فأكثر عينا من غير عقد الشركة، وهي نوعان: شركة اختيار: وهي التي تنشأ بفعل الشريكين، مثل أن يشتريا شيئا (إلی قوله) مشتركا بينهما شركة ملك اھ (5/ 523) ۔