جبری پراویڈنٹ فنڈ اور جی پی فنڈ کی رقم پر محکمہ کی طرف سے دی جانے والی رقم -اسلامی بینکوں میں سرمایہ کاری کرنے کاحکم

آج کل کے سودی نظام کی موجودگی میں مندرجہ ذیل اداروں کے منافع کی کیا حیثیت ہے؟
۱: پاکستان اسٹیل یا دوسرے سرکاری اداروں میں پراویڈنٹ فنڈ یا جی پی فنڈ کی کٹوتی پر ادارے کی جانب سے دیے گئے منافع جائز ہیں یا سود کی کوئی شکل ہے؟
۲:میزان بینک یا بینک اسلامی یا دوسرے ایسے ادارے جن کے کہنے کے مطابق وہ غیر سودی کاروبار کرتے ہیں، ان اداروں میں لگے ہوئے سرمایہ پر منافع جائز ہے، یا یہ بھی سود کی کوئی شکل ہے؟
۳:شیئرز کا کاروبار جائز ہے یا ناجائز؟ اگر جائز ہے تو کیسے؟ مکمل وضاحت اور صراحت کے ساتھ ان پر فتویٰ عنایت کریں۔

الجوابُ حامِدا ًو مُصلیِّا ً

جبری پراویڈنٹ فنڈ اور جی پی فنڈ کی رقم پر محکمہ جو زیادتی دیتا ہے، چاہے سود کے نام سے ہو ،یا کسی اور نام سے در اصل یہ تنخواہ ہی کا حصہ ہے، لہٰذا ملازم کے لئے اس کا لینا اور اپنے استعمال میں لانا جائز ہے ، بشرطیکہ یہ کٹوتی اپنے اختیار سے نہ ہو، اور اگر یہ کٹوتی اپنے اختیار سے ہے، تو تشبہ بالر با بھی ہے ،اور سود خوری کا ذریعہ بنا لینے کی وجہ سے اس سے احتراز لازم ہے۔
: واضح ہو کہ ہماری معلومات کے مطابق میزان بینک اور بینک اسلامی کے اکثر معاملات شرعی ایڈوائزر کی نگرانی اور اصولِ شرعیہ موافق ہوتے ہیں، اس لئے ان دونوں بینکوں کے ذریعہ سرمایہ کاری کرنے اور سیونگ اکاؤنٹ کھلوانے کی اجازت بھی دیجاتی ہے،ہاں اگر کسی کو ان دونوں بینکوں کے کسی خاص معاملہ پر اعتراض ہو، اور وہ متعلقہ بینک کے ایڈوائیزر سے بھی حل نہ ہو رہا ہو تو اس کی وضاحت کر کے اس سے متعلق حکمِ شرعی بھی معلوم کیا جا سکتا ہے۔
۳: شیئرز کا کاروبار جائز ہے، بشرطیکہ اس کمپنی کا اصل کاروبار حلال ہو، اس کمپنی کے تمام اثاثے نقد رقم کی شکل میں نہ ہوں ،بلکہ کمپنی نے کچھ فکسڈ اثاثے حاصل کر لیے ہوں، اگر کمپنی سودی لین دین کرتی ہو تو اس کی سالانہ میٹنگ میں اس کے خلاف آواز اُٹھائی جائے۔اور جتنا نفع سودی ڈپازٹ سے حاصل ہوا ہو اُسے صدقہ کر دے۔

مأخَذُ الفَتوی

ففي البحر الرائق: (بل بالتعجيل أو بشرطه أو بالاستيفاء أو بالتمكن) يعني لا يملك الأجرة إلا بواحد من هذه الأربعة والمراد أنه لا يستحقها المؤجر إلا بذلك اھ (7/ 300)۔
وفي الهداية شرح البداية: وإذا كان أحد العوضين أو كلاهما محرما فالبيع فاسد كالبيع بالميتة والدم والخمر والخنزير اھ (3/ 42)۔
وفيھا أیضاً: وكذلك إن باع سيفا محلى بمائة درهم وحليته خمسون فدفع من الثمن خمسين جاز البيع وكان المقبوض حصة الفضة وإن لم يبين اھ(3/ 83)۔