مضاربت میں نفع کا تناسب کیا ہونا چاہیئے ؟

کیا فرماتے ہیں علماءِ دین ومفتیانِ شرع متین اس مسئلہ کے بارے میں کہ میں مسمیٰ ممتاز شاہ نے نیاز شاہ ولد امان اللہ کو نوے ہزار روپے دیے، جس سے اُس نے اپنے چلتے کا روبار (پرچون کی دکان میں سامان ڈالا )جس کی تحریر اور معاہدے کی کاپی سوال کے ساتھ منسلک ہے، اس رقم میں چالیس ہزار میرے ذاتی تھے، اور پچاس ہزار روپے میں نے بھائی مرحوم کے یتیم بچوں کےلیکر دیے تھے، تاکہ ان سے یتیم بچوں کا کچھ روزگار لگ جائے ، رقم اسے بطورِ مضاربت اس بنیاد پر دی گئی کہ جو نفع ہوگا، اس کو آدھا آدھا کر لینگے، نفع کا اندازہ نیاز شاہ نے دس ہزار روپے لگایا تھا کہ پانچ پانچ دونوں تقسیم کر لینگے، اب اسکے بعد نیاز شاہ حسبِ معاہدہ تقریباً چار ماہ تک کاروبار میں نفع کے نام سے تین ہزار کبھی پچیس سو کم و بیش دیتا رہا ، اسکے بعد اس نے کہا کہ میں تین ہزار ماہا نہ نہیں دے سکتا، بلکہ ایک ہزار روپے دیا کرونگا، اس پر میں تیار نہیں ہوا ،میں نے کہا تم معاہدہ ختم کر کے ہمارے پیسے واپس کر دو،اس پر اتفاق بھی ہوا، لیکن اس نے پیسے تیرہ ماہ بعد تھوڑے تھوڑے کر کے دیے ۔اب سوال یہ ہے کہ اب اس کی دکان چل رہی ہے ،تو کیا ہمارا معاہدہ ختم ہو گیا ؟ اور کیا میں اور بھائی کے یتیم بچے نیاز شاہ سے ان تیرہ ماہ کے منافع کا مطالبہ کر سکتے ہیں ،کیونکہ اس نے ہمارے پیسوں سے تجارت کی ہے اور نفع کمایا ہے۔ براہِ کرم قرآن و سنت کی روشنی میں جواب مرحمت فرماکر عنداللہ ماجور ہوں۔

الجوابُ حامِدا ًو مُصلیِّا ً

صورتِ مسئولہ میں جو رقم سائل نے نیاز شاہ کو بطور ِمضاربت دی ،اس کے عوض آنے والا مال جب تک دکان میں موجود ہو تو اس صورت میں محض ختم کر کے میرے پیسے واپس کر دو ، کہنے سے معاہدہ ختم نہ ہوگا، اس لئے شخصِ مذکور ’’ نیاز شاہ‘‘ کو چاہئیے کہ مالِ مضاربت کے تناسب سے حساب لگا کر محتاط اندازہ کے مطابق سارا نفع بھی حوالہ کرے، اور یتیموں کا مال ناحق طریقہ سے نہ کھائے۔

مأخَذُ الفَتوی

کما فی بدائع الصنائع: ويشترط أيضا أن يكون رأس المال عينا وقت الفسخ دراهم أو دنانير حتى لو نهى رب المال المضارب عن التصرف ورأس المال عروض وقت النهي لم يصح نهيه وله أن يبيعها لأنه يحتاج إلى بيعها بالدراهم والدنانير ليظهر الربح فكان النهي والفسخ إبطالا لحقه في التصرف فلا يملك ذلك وإن كان رأس المال دراهم أو دنانير وقت الفسخ والنهي صح الفسخ والنهي اھ (6/ 109) ۔