اولاد نہ ہونے کی صورت میں ڈاکٹر سے چیک کروانا

مفتی صاحب میرے دوست کی شادی کو ابھی صرف 1 سال اور کچھ مہینے ہوئے ہیں، اب میرے دوست کے ساس اور سسر اولاد چاہتے ہیں، اسلئے وہ اپنے داماد اور بیٹی کو ہسپتال میں چیک کروانے کا بول رہے ہیں، کہ 1 سال ہو گیا اور اولاد نہیں ہوئی، میں نے اسے سمجھایا ہے کہ اللہ پر چھوڑ دے شادی کو ابھی صرف ایک سال تو ہوا ہے، اب آپکی کیا رائے ہے کیا عورت اور مرد یہ چیک اپ کروا سکتے ہیں کے اولاد ہوگی یا نہیں ہوگی ؟اگر نہیں تو پھر سسرال والوں کو کیسے سمجھایا جائے ؟ سنا ہے ڈاکٹر کہتے ہے کے انکو منی فوراً دینی پڑتی ہے، تو ایسی صورت میں میاں بیوی کا صحبت کرنا بھی بہت مشکل ہے؟ تو کیا کرے آپ رہنمائی فرمائیں۔

الجوابُ حامِدا ًو مُصلیِّا ً

صورت مسئولہ میں سائل کے دوست کے سسرال والوں کا اولاد کے معاملہ میں جلدی کرنا اور داماد اور بیٹی کو چیک اپ پر مجبورکرنا جبکہ شادی کو ابھی سال کا عرصہ ہوا ہے، مناسب نہیں، تاہم اگر اس سلسلہ میں انکے کچھ خدشات ہوں، اور اسی وجہ سے ڈاکٹرز حضرات سے معائنہ کرانا چاہتے ہوں تو اس میں بھی کوئی حرج نہیں، البتہ اگر معائنہ کی صورت میں شوہر کے مادہ منویہ کے ٹیسٹ کی ضرورت پڑے تو اس نمونہ کے حصول کیلئے بوقت ضرورت بیوی کے ہاتھ سےمادہ منویہ خارج کرکےحاصل کرلینے کی گنجائش ہوگی۔

مأخَذُ الفَتوی

کما قال اللہ تعالٰی: لِلَّهِ مُلْكُ السَّمَاوَاتِ وَالْأَرْضِ يَخْلُقُ مَا يَشَاءُ يَهَبُ لِمَنْ يَشَاءُ إِنَاثًا وَيَهَبُ لِمَنْ يَشَاءُ الذُّكُورَ (49) أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَنْ يَشَاءُ عَقِيمًا إِنَّهُ عَلِيمٌ قَدِيرٌ (50)سورۃ الشوری)۔
وفی رد المحتار: ويجوز أن يستمني بيد زوجته وخادمته اهـ وسيذكر الشارح في الحدود عن الجوهرة أنه يكره ولعل المراد به كراهة التنزيه فلا ينافي قول المعراج يجوز تأمل وفي السراج إن أراد بذلك تسكين الشهوة المفرطة الشاغلة للقلب وكان عزبا لا زوجة له ولا أمة أو كان إلا أنه لا يقدر على الوصول إليها لعذر قال أبو الليث أرجو أن لا وبال عليه وأما إذا فعله لاستجلاب الشهوة فهو آثم اهـ. (ج2 صـ399 باب مایفسد الصوم ومالا یفسدہ ط: سعید)۔