زیر استعمال مکان کا مالک معلوم نہ ہو تو کیا کرے

جنابِ عالی! گزارش ہے کہ میں ڈاکٹر فیض الرحمٰن ولد فضل الرحمٰن سکنہ بلوچی اسٹریٹ کوئٹہ، عرصہ 52 سال سے ایک مکان میں رہائش پذیر ہوں، والد صاحب 20 سال پہلے وفات پاچکے ہیں، اس سارے عرصے 1972 سے آج تک اس مکان کا کوئی مالک نہ میرے پاس آیا اور نہ کسی کا پتہ چلا، ہم نے اپنے طور پر ڈھونڈنے کی کوشش کی، مگر کسی کا پتہ نہیں چلا، نہ ہمارے والد صاحب کو اور نہ ہی ہمیں، ہماری پوزیشن واضح کی جائے کہ قانونی اور شرعی طور پر ہماری کیا حیثیت ہے اور ہمارا کیا حق ہے؟ تاکہ دانستہ یا نا دانستہ طور پر کسی کی دل آزاری نہ ہو۔ جناب کی نوازش ہوگی۔

تنقیح:

1)سائل نے اپنے علاقے میں کسی حکومتی ادارہ سے رابطہ کیا تھا، جہاں زمینوں کی الاٹمنٹ ہوتی ہو؟
2)سائل نے اپنے پڑوس میں مذکور زمین کے بارے میں کسی سے پوچھا تھا کہ یہ زمین کس کی ہے؟
3)سائل نے اپنے والد کے ہم عمر لوگوں سے اس بارے میں پوچھا تھا؟
4)سائل کے والد یا دادا جب اس زمین میں پہلی بار آئے تھے تو یہ گھر بنا ہوا تھا یا بنجر زمین تھی، جس کو انہوں نے آباد کیا تھا؟

جواب ِ تنقیح:

مذکور زمین سائل کے نانا کے ایک دوست کی تھی ، اب نانا اور ان کے دوست دونوں کا انتقال ہوچکا ہے، نانا کے مذکور دوست کے کسی ولی یا وارث کا پتہ معلوم نہیں ہے، حکومتی ادارہ سے بات کی تو انہوں نے کہا کہ آپ اس زمین میں رہیں، جب کوئی آئے گا تو ہم آپ کے پاس بھیج دیں گے، پڑوس میں کسی کو پتہ نہیں ہے، سائل کے نانا جب اس زمین میں آئے تھے تو صرف ایک کمرہ اور صحن تھا، جو کہ بہت بوسیدہ ہوچکا تھا، جس کو ختم کر کے نانا نے دوبارہ تعمیر کیا، کچھ بزرگوں کا کہنا ہے کہ آپ کے نانا مرحوم کا اپنے مذکور دوست کے ساتھ کچھ لین دین تھا، تو ممکن ہے کہ نانا نے وہ زمین خریدی ہو۔

الجوابُ حامِدا ًو مُصلیِّا ً

مفتی غیب نہیں جانتا، وہ سوال کے مطابق جواب دینے کا پابند ہوتا ہے، سوال کے سچ یا جھوٹ پر مبنی ہونے کی ذمہ داری سائل پر عائد ہوتی ہے، اس مختصر تمہید کے بعد واضح ہو کہ سوال میں ذکر کردہ تفصیل اور اس کے ساتھ درج تنقیحات و جوابات کے مطابق مذکور مکان کی زمین ( پلاٹ ) سائل کے نانا کے دوست کی ملکیت تھی اور اس کی اجازت سے سائل کے نانا نے اس پر بنی ہوئی بوسیدہ تعمیر میں رہائش اختیار کر کے بعد میں اس کو منہدم کر کے اس پر نیا مکان تعمیر کرایا تھا، اس لئے اصل مالک کی طرف سے صراحتاً یا دلالۃً اجازت کی وجہ سے سائل کے نانا اور اس کے بعد سائل کے لئے اس میں رہائش اختیار کرنے کی گنجائش تھی، اس لئے وہ اس میں رہائش کی وجہ سے گناہگار بھی نہ ہوں گے، مگر فقط اس میں رہائش اختیار کرنے یا اصل مالک اور اس کے ورثا کا علم نہ ہونے کہ وجہ سے اس مکان کی زمین سائل کی ملکیت نہیں بنی ، بلکہ بدستور اصل مالک اور اس کے انتقال کی صورت میں اس کے ورثا کی ملکیت ہے، لہٰذا سائل کے لئے اسے قانونی دستاویزات میں اپنے نام ٹرانسفر کرا کر اپنے آپ کو حقیقی مالک ظاہرکرنا یا حقیقی مالک کی طرح اس کی خرید و فروخت وغیرہ جیسے تصرفات کرنا شرعاً جائز نہیں بلکہ حقیقی ورثا کو تلاش کر کے ان کے حوالے کرنا یا ان کے ساتھ مل کر شرعی طریقہ سے اس معاملہ کو حل کرنا لازم ہے ، تاکہ مواخذۂ دنیوی و اخروی سے سبکدوشی ہوسکے۔

مأخَذُ الفَتوی

کما فی شرح المجلۃ: ما ثبت بزمان یحکم ببقاء ما لم یقم الدلیل علی خلافہ ، فاذا ثبت بزمان ملک شیء لأحد یحکم ببقاء الملک لہ ما لم یوجد ما یزیلہ ( الی قولہ ) فمن کان مالکاً لعین ملکیۃ ثابتۃ متحققۃ فیما مضی، لا یخرج عن ملکہ فیما بعد، الا باثبات ما یزیلہ ، بنحو ھبۃ أو بیع أو اقرار الخ ( المادۃ 10 ص 29 ط:حقانیہ )۔