نانی نے نواسے کے لئے اپنے بیٹے کے پاس سونا رکھا کہ اس کی شادی پر اسے دیدینا

کیا فرماتے ہیں مفتیان کرام فقہ حنفی کے راجح قول کے مطابق اس مسئلے کہ بارے میں کہ:
میری امی نے اپنی زندگی میں سونا میرے حوالے کیا اور مجھ سے کہا کہ ”تم نے یہ سونا اپنی بڑی بہن کے بیٹے مرتضیٰ کو دینا ہے۔ یہ سونا میں نے تحفہ کے طور پر مرتضی کی بیوی کے لئے رکھا ہوا ہے۔ جب مرتضی کی شادی ہو تو اسے دے دینا اور بتانا کہ نانوں نے یہ تحفہ دیا ہے“۔سونا حوالے کرنے کے کچھ عرصے بعد میری امی فوت ہو جاتی ہیں۔ مرتضی اس وقت 12سال کا ہے۔ اب مجھے پریشانی یہ لگی ہوئی ہے کہ مجھے خود اپنی زندگی موت کا نہیں پتا۔ میں نے سونا ایک تھیلی میں رکھا ہوا ہے اور اس میں ایک پرچی لکھ کر رکھی ہوئی ہے کہ ”یہ سونا مرتضی کی نانوں نے مرتضی کی بیوی کو بطورِ تحفہ کے دیا ہوا ہے جوکہ میرے پاس امانت پڑا ہے“۔ اب مرتضی کی شادی کب ہوتی ہے مجھے نہیں پتا، اس وقت تک میں زندہ بھی رہوں گا کہ نہیں یہ بھی نہیں پتا۔
سوال: اِس سونے کو میں اپنے پاس ہی رکھوں؟ جب مرتضی کی شادی ہو جائے، اس دن مرتضی کے حوالے
کروں؟ یا مرتضی کو ابھی 12سال کی عمر میں ہی حوالے کر دوں؟ یا میں رکھوں تو اپنے پاس ہی لیکن مرتضی کو اطلاع کر دوں کہ آپکی نانوں نے آپکی بیوی کے لئے ایک تحفہ میرے پاس رکھوایا ہوا ہے لیکن دوں گا تب جب آپکی شادی ہو جائے گی۔؟ یا مرتضی جیسے ہی بالغ ہو تو اُس وقت اسکے حوالے کر دوں تاکہ وہ خود اس ذمہ داری کو سنبھالے؟ یا مرتضی سمیت اُسکے امی ابو بہن بھائی اور اپنے گھر والوں سب کو بتا دوں کہ مرتضی کی نانوں نے میرے پاس مرتضی کی بیوی کے لئے ایک تحفہ میرے پاس رکھوایا ہوا ہے اگرمیں مر گیا تو اسے میرے ترکے میں نہ سمجھا جائے بلکہ یہ میرے پاس امانت پڑا ہے۔

الجوابُ حامِدا ًو مُصلیِّا ً

تنقیح
سائل کا سوال پوری طرح واضح نہیں ہے کہ سائل کی والدہ نے مذکور سونا وصیت کیا تھا یا بطور ہبہ؟ اگر ہبہ دیا تھا تو سونا اپنی حیاتی میں اپنی بیٹی ( جوکہ مرتضی کی والدہ ہے ) کو قبضہ دیا تھا یا صرف زبانی طور پر سونا دینے کا کہا تھا؟
کیا یہ ہبہ ان کی مرض الوفات میں تھا یا حالت صحت میں؟ براہ کرم ان سوالات کے جوابات دے کر سوال مکرر بھیج دیں۔