توحید بالصفات

السلام علیکم!
توحید بالصفات سے کیا مراد ہے؟
۱۔ اس کے حق میں قرآن کی کوئی آیت کا حوالہ دیں۔ آیت کا حوالہ اور ترجمہ بھی بتائیں۔
۲۔ توحید بالصفات کے حق میں احادیث ترجمہ کے ساتھ بتائیں۔
۳۔ توحید پر کسی اچھی کتاب کا نام ، مصنف کے ساتھ بتائیں۔

الجوابُ حامِدا ًو مُصلیِّا ً

توحید بالصفات کا مطلب یہ ہے جس طرح اللہ تعالیٰ اپنی ذات میں یکتا ہے، اسی طرح اس کی صفات مثلاً قدرت، علم، سمع، بصر، رزق دینے، اولاد دینے، موت وحیات کا مالک ہونے، نفع ونقصان، عزت وذلت دینے اور تحریم و تحلیل وغیرہ میں اس کو یکتا مانا جائے اور مخلوق میں سے کسی کے لیے اِن صفات کو اللہ جیسی تسلیم نہ کیا جائے۔
توحید بالصفات کے بارے میں قرآن مجید میں متعدد آیات مذکور ہیں، یہاں پر بطورِ نمونہ صرف ایک آیت ذکر کی جاتی ہے، جس میں باری تعالیٰ نے اپنی چند صفات ذکر کر کے فرمایا کہ کیاتمہارے شرکاء میں سے بھی کوئی ایسا ہےجو ان کاموں میں سے کوئی کام کر دکھائے۔
قال اللہ تعالیٰ: ﴿اللَّهُ الَّذِي خَلَقَكُمْ ثُمَّ رَزَقَكُمْ ثُمَّ يُمِيتُكُمْ ثُمَّ يُحْيِيكُمْ هَلْ مِنْ شُرَكَائِكُمْ مَنْ يَفْعَلُ مِنْ ذَلِكُمْ مِنْ شَيْءٍ سُبْحَانَهُ وَتَعَالَى عَمَّا يُشْرِكُونَ﴾ (الروم: 40)
’’اللہ وہ ہے جس نے تمہیں پیدا کیا، پھر اس نے تمہیں رزق دیا، پھر وہ تمہیں موت دیتا ہے، پھر تمہیں زندہ کرے گا۔ جن کو تم نے اللہ کا شریک مانا ہوا ہے، کیا ان میں سے کوئی ہے جو ان میں سے کوئی کام کرتا ہو؟ پاک ہے وہ اور بہت بالا وبرتر اس شرک سے جس کا ارتکاب یہ لوگ کرتے ہیں‘‘۔ (آسان ترجمہ قرآن)
ایسے ہی احادیثِ طبیہ میں سے بھی ایک حدیث پاک ملاحظہ ہو:
و فی صحيح البخاري: عن محمد بن عمرو بن حلحلة الدؤلي(إلی قوله) فسمعت رسول الله - صلى الله عليه وسلم - يخطب الناس في ذلك على منبره هذا (إلی قوله) وإني لست أحرم حلالا ولا أحل حراما الخ(4/ 83)
ترجمہ: مسوربن مخزمہ نے کہا۔۔۔ میں نے رسول اللہﷺ کو اس منبر پر لوگوں کو خطبہ دیتے ہوئے سنا آپﷺ فرما رہے تھے، میں نہ تو کسی حلال کو حرام کرتا ہوں اور نہ حرام کو حلال‘‘۔
توحید سے متعلق کتاب ’’توحید اور شرک کی حقیقت‘‘ مؤلفہ مولانا سید نور الحسن شاہ بخاری کا مطالعہ ان شاء اللہ مفید ہوگا۔والله أعلم بالصواب!