مرد ڈاکٹر کا مریض عورتوں کو دیکھنے ،چھونے اور طالبات کو نرسنگ سیکھانے کا حکم

السلام علیکم ! میں ایک میل نرس ہوں اور میں ایک گورنمنٹ ہسپتال میں نرس کے طور پر کام کررہا ہوں ، ہمارے پاس فیمیل مریض بھی آتی ہیں ، ان کو دیکھنے یا ان کو کسی بھی پروسیجر کے لئے ہاتھ لگانا کیسا ہے ؟ اور ہمارےپاس فیمیل نرسنگ طالبات بھی آتی ہیں ، ان کو سیکھانے کے لیے دیکھنا کیسا ہے؟ کیونکہ بعض اوقات غلط خیال بھی ذہن میں آجاتا ہے اور ان سے ٹچ ہونا کیساہے؟

الجوابُ حامِدا ًو مُصلیِّا ً

عام حالات میں تو اولًا خواتین کا ایسے علاج و معالجہ کی خاطر جس میں شرعی پردہ باقی نہ رہنے کا اندیشہ ہو کسی مرد ڈاکٹر کے پاس جانا درست نہیں ، بلکہ کسی لیڈی ڈاکٹر کے پاس جانے کا اہتمام کرنا چاہئیے ،تاہم اگر کسی سرکاری ادارہ میں اس طرح کے کیسز آتے ہوں، تو وہاں مرد ڈاکٹر کے ساتھ ساتھ خواتین ڈاکٹر کا بھی انتظام ہونا چاہیئے ،تاکہ کسی قسم کے خلاف شرع امور کا ارتکاب نہ ہو، لیکن اس سب کے باوجود اگر سائل کے پاس خواتین مریض آتی ہوں ، تو علاج و معالجہ کے دوران بلاشہوت بقدر ضرورت انہیں دیکھنے اور جسم کو ہاتھ لگانے کی اجازت ہوگی ، جبکہ پڑھنے والی طالبات کو سمجھانے کی غرض سے ان کی طرف دیکھنے کی گنجائش ہے ، لیکن ان کو دیکھتے ہوئے دانستہ طور پر دل میں غلط خیالات اور تصورات کو جگہ دینا اور اس بارے میں مسلسل سوچتے رہنا شرعاً درست نہیں اور پڑھنے والی طالبات کو بھی چاہیئے کہ شرعی پردے کا خیال رکھے تاکہ ممکنہ فتنے سے حفاظت ہو سکے۔

مأخَذُ الفَتوی

كما في الدر المختار: فإن خاف الشهوة أوشك امتنع النظر مقيدة بعدم الشهدة والافحرام وهذا في زمانهم، وأما في زماننا فمنع من الشابة إلا النظر لحاجة کقاضي وشاهد يحكم ويشهد عليها اھ (فصل في النظر والمس ،ج6 ص ٣٧0 ط: سعيد)۔
وفي البحر الرائق: والطبيب انما يجوز له ذلك إذا لم يوجد امرأة طبيبة فإن وجدت فلا يجوز له أن ينظر ثم ينظر ويغض بصرہ عن غير ذلك الموضع ان استطاع لأن ما ثبت للضروره يتقدر بقدرها اھ (ج8 ص 192 ط:ماجدیہ)۔واللہ اعلم