شرکاء کا مشترکہ چیز , کسی ایک شریکِ کو حوالے کیے بغیر گفٹ کر کے اس کے نام کردینے کا حکم

میری ساس کا چالیس سال پہلے ا نتقال ہوگیا ہے ،ان کے نام ایک گھر تھا ، وہ گھر اپنی زندگی میں انہوں نے کسی کو نہیں دیا ، لیکن بعد میں تمام لواحقین نے باہمی رضامندی سے وہ گھر عدالت میں جاکر میرے شوہر کے نام کردیا ، اور گھر کی فائل بھی دے دی ، لیکن اب وہ سب کہہ رہے ہیں کہ ہمارا حصہ دو ، اس کا شرعی حکم کیا ہے ۔

نوٹ : گھر شوہر کے نام کردیا تھا ، لیکن اس گھر پر میرے شوہر کو قبضہ نہیں دیا تھا ، بلکہ وہ گھر میرے شوہر کی بہن کو عارضی طور پر دے دیا تھا ،یہ کہہ کر کہ بعد میں گھر آپ کے حوالہ کردیں گے ،لیکن اب وہ گھر دینے سے انکار کررہے ہیں ،اور ہر وارث اپنے حصے کا مطالبہ کررہا ہے ۔

الجوابُ حامِدا ًو مُصلیِّا ً

واضح ہو کہ فقط کاغذات میں کوئی چیز کسی کے نام کردینے سے شرعاً اس کی ملکیت نہیں بنتی جب تک اسے اس چیز پر باقاعدہ مالکانہ قبضہ نہ دیا جائے ، لہذا سائلہ کی ساس کے انتقال کے بعد اس کے تمام ورثاء نےباہمی رضامندی سے مذکور گھر اگر سائلہ کے شوہر کے فقط نام کیاہو اور مذکور مکان مستقل طور پر سائلہ کے شوہر کو بطورِ تحفہ دیکر اسے اس پر باضابطہ مالکانہ قبضہ نہ دیا ہو (جیساکہ سوال میں درج نوٹ سے معلوم ہورہا ہے ) تو ایسی صورت میں سائلہ کا شوہر مذکور گھر کا مالک نہیں بنا ، لہذا اگر دیگر شرکاء مذکور گھر سائلہ کے شوہر کو حوالہ نہ کرنا چاہتے ہوں بلکہ ہر شریک اپنا حصہ لینے کا خواہش مند ہو تو ایسی صورت میں سائلہ کے شوہر کیلئے ورثاء کو مکان کی حوالگی پر مجبور کرنے کا اختیار حاصل نہ ہوگا ،بلکہ گھر سائلہ کے شوہر سمیت تمام ورثاء کےدرمیان ان کے حصص کے بقدر تقسیم ہو گا ۔

مأخَذُ الفَتوی

کما فی الدر المختار : (و تتم) الهبة (بالقبض) الكامل (و لو الموهوب شاغلا لملك الواهب لا مشغولا به) والأصل أن الموهوب إن مشغولا بملك الواهب منع تمامها اھ (5/690)۔