حلال کی مہر نہ ہونے کی صورت میں, صرف اجزاءِ ترکیبی دیکھ کر حلال ہونےکا فیصلہ کرنا

السلام علیکم! شیخ اگر پروڈکٹ (مصنوعات جیسے ڈبل روٹی، بسکٹ اور چپس وغیرہ) حلال کی تصدیق شدہ نہیں ہے ، لیکن پیکنگ میں درج تمام اجزاء حلال ہوں , تو اس صورت میں مندرجہ ذیل صورتوں میں پروڈکٹ کی کیا حیثیت ہوگی؟
1۔ہم نہیں جانتے کہ پیداوار کے عمل میں کوئی کراس آلودگی ہوئی ہے یانہیں،
2۔ ہم نہیں جانتے کہ پیداوار کے عمل میں کوئی اور اجزاء (جو پیکنگ میں مذکور نہیں) استعمال کیے گئے ہیں یا نہیں۔

الجوابُ حامِدا ًو مُصلیِّا ً

واضح ہو کہ جب تک کسی چیز کے بارے میں یقین یا غالب گمان کی حد تک اس چیز کے حرام ہونے کا یا اُسکے اجزاءِ ترکیبی کے حرام اور نجس ہونے کا علم نہ ہو جائے تو وہ چیز شرعاً حلال ہوگی اور اُسکا کھانا شرعاً جائز ہوگا-
لہذا صورتِ مسئولہ میں بھی جب تک کسی پروڈکٹ کے حرام ہونے کا یقین یا غالب گمان نہ ہو جائے تو بلا وجہ شکوک و شبہات میں پڑنے کی ضرورت نہیں، بلکہ اُنکو استعمال کرنے کی اجازت ہے۔

مأخَذُ الفَتوی

کما فی قوله تعالیٰ : وَ يُحِلُّ لَهُمُ الطَّيِّبَاتِ وَ يُحَرِّمُ عَلَيْهِمُ الْخَبَائِثَ وَ يَضَعُ عَنْهُمْ إِصْرَهُمْ وَ الْأَغْلَالَ الَّتِي كَانَتْ عَلَيْهِمْ۔الآیة (الأعراف: 157)۔
و فی المبسوط للسرخسي : أن الأصل في الأشياء الإباحة ، و أن الحرمة بالنهي عنها شرعا۔اھ (24/77)۔