السلام علیکم !مفتی صاحب معلوم یہ کرنا تھا کہ نبی پاک صلی اللہ علیہ وسلم کو تمام جہانوں کے لیے رحمت بنا کے بھیجا ،اور کلمہ کے آخر میں " ہیں " آتا ہے " تھا "نہیں، تو کیا یہ کہنا صحیح ہے کہ آپ نبی پاک " رحمت للعلمین" تھے، یا غلط ہے ۔ یا یہ کہا جائے کہ" رحمت العلمین" ہیں ۔
دوسرا یہ ہے کہ میلاد کرنا چاہیے، عورتوں کا ہو یا مردوں کا؟ ثابت نہیں تو کیا ثواب بھی نہیں، کیونکہ میلاد میں اللہ اور رسول کی بڑھائی بیان کی جاتی ہے نہ کہ کوئی اور چیز ۔جلد جواب کا انتظار رہے گا۔
آپ صلی اللہ علیہ وسلم کا حیاً ومیتاً رحمۃ للعالمین ہونا مسلم ہے ، اس لیے مذکور دونوں اطلاقات (تھے اور ہیں) درست ہیں، جبکہ کلمہ میں ’’ہیں‘‘کا ترجمہ عربی گرامر کے اعتبار سے ہے اور آپ کی نبوت تا قیامت ہے۔ جہاں تک مجلس میلاد کا تعلق ہے تو اس کا حکم یہ ہے کہ حضور اقدس صلی اللہ علیہ وسلم بعثت کے بعد تئیس سال تک بقید حیات رہے، اس کے بعد تیس سال خلافت راشدہ کے گزرے اور اس کے بعد ایک سو دس ہجری تک صحابہ کرام رضوان اللہ علیہم اجمعین کا دور تقریبا ۲۲۰ھ کے لگ بھگ تابعین اور تبع تابعین رحمہم اللہ کا دور رہا ہے، جو خیر القرون کا دور کہلاتا ہے، لیکن اس دور میں حضور صلی اللہ علیہ وسلم کے کامل عشق و محبت کے باوجود دور تک بھی اس کی کوئی مثال نہیں ملتی اور نہ ہی کوئی یہ ثابت کر کے دکھا سکتا ہے۔ بلکہ یہ بدعت ۶۰۴ ہجری میں ایک بادشاہ مظفر الدین کو کری بن اربل کے حکم سے ایجاد ہوئی ۔ چنانچہ امام اہل سنت و الجماعت مولانا سرفراز خان صفدر صاحب رحمہ اللہ تعالیٰ نے اپنی کتاب راہ سنت میں امام احمد بن محمد مصری مالکیؒ کے حوالہ سے لکھا ہے ۔ اس کتاب کا مطالعہ کیا جاسکتا ہے ۔