حیلہ اسقاط - تراویح پر اجرت

کیا فرماتے ہیں علمائے کرام اس مسئلہ کے بارے میں کہ (۱) حیلہ اسقاط مروجہ جس میں یتیم اور غیر کا مال تقسیم ہوتا ہے امیر اور غریب کو دیا جاتا ہے، میت کے مال کو رکھ کر علمائے کرام اور بعض عوام دائرہ بناکر ایک دوسرے کو یہ الفاظ کہہ کر بخشتے ہیں کہ ’’یہ مال قلیلہ بخلاع کثیرہ بغبن فاحشہ میں نے آپ کو بخش دیا‘‘ یہ طریقہ اختیار کرنا کیسا ہے؟
(۲) تراویح کے ختم پر اور ایصالِ ثواب کے ختم پر اُجرت لینا کیسا ہے؟ برائے مہربانی قرآن و حدیث کی روشنی میں جواب دیں۔

الجوابُ حامِدا ًو مُصلیِّا ً

(۱) مذکورہ مروجہ حیلۂ اسقاط بلاشبہ بدعت اور ناجائز ہے جس کا شریعت مطہرہ میں کوئی ثبوت نہیں اور جس حیلہ اسقاط کی بعض فقہاء نے فقیر میت کیلئے کچھ شرائط کے ساتھ اجازت دی ہے، عوام لوگ نہ تو ان شرائط کو جانتے ہیں اور نہ ان کی رعایت کی جاتی ہے، لہٰذا مذکورہ حیلہ اسقاط سے احتراز لازم ہے۔ *

(۲) تراویح اور ایصالِ ثواب کے ختم پر مشروط یا معروف طریقہ سے اجرت لینا جائز نہیں اور اگر کوئی حافظ قرآن بلا معاوضہ کے دستیاب نہ ہوسکے تو ’’الم تر‘‘ سے تراویح پڑھنا زیادہ افضل اور بہتر ہے۔ *

مأخَذُ الفَتوی

* فی الدر المختار: ولو لم یترک مالا یستقرض وارثہ نصف صاع مثلا ویدفعہ لفقیر ثم یدفعہ الفقیر للوارث ثم وثم حتی یتم۔ (ج۲، ص٧٣)

* فی الشامیۃ: ومنھا الوصیۃ من المیت باتخاذ الطعام والضیافۃ یوم موتہ او بعدہ وباعطاء دراھم لمن یتلو القرآن لروحہ أو یسبح أو یھلل لہ وکلھا بدع منکرات باطلۃ، والماخوذ منھا حرام لآخذ، وھو عاص بالتلاوۃ والذکر لأجل الدنیا۔ اھـ (ج٦، ص٥٧) واللہ اعلم بالصواب