قادیانی عورت کے اسلام قبول کرنے کے بعد ،کسی مسلمان سے نکاح کیلۓ توقف کا دورانیہ

کیا فرماتے ہیں علماءِ کرام اس مسئلہ کے بارے میں کہ اگر کوئی قادیانی عورت جو کہ شادی شدہ ہو ، اسلام قبول کرنا چاہتی ہے ، تو اسلام قبول کرنے کے بعد عدت کیلۓ کتنا انتظار کرے؟ جس کے بعد اسلامی طریقہ سے وہ نکاح کر سکے ، نیز اسلامی طریقہ سے نکاح کرنے کیلیے کیا کرنا ہوگا ؟

الجوابُ حامِدا ًو مُصلیِّا ً

قادیانی عورت کا اسلام قبول کرنا اس کے حق میں بہت مبارک اور سعادتِ دارین کا باعث ہے ، ایسی عورت جو کفر سے اسلام میں داخل ہوگئی ہو ، اس کے شوہر پر اسلام پیش کیا جائے ، اگر وہ اسلام قبول کرلےتو وہ بدستور میاں بیوی رہیں گےاور نکاحِ جدید کی بھی ضرورت نہیں ، ورنہ وہ قبولِ اسلام کے بعد تین ماہواریاں گزرنے پر کسی بھی مسلمان سے اپنا نکاح کر سکتی ہے ، جس کا طریقہ یہ ہے کہ دو گواہوں کی موجودگی میں ایجاب و قبول ہو اور حق مہر بھی مقرر کیا جائے،پھر اگر یہ خود مجلسِ نکاح میں حاضر نہ ہو تو اس کا وکیل جسے وہ اپنا نکاح کرنے کیلۓ مقرر کرے ، وہ ایجاب و قبول کر سکتا ہے۔

مأخَذُ الفَتوی

فی الھندية : و إذا أسلم أحد الزوجين في دار الحرب و لم يكونا من أهل الكتاب أو كانا و المرأة هي التي أسلمت فإنه يتوقف انقطاع النكاح بينهما على مضي ثلاث حيض سواء دخل بها أو لم يدخل بها كذا في الكافي فإن أسلم الآخر قبل ذلك فالنكاح باق و لو كانا مستأمنين فالبينونة إما بعرض الإسلام على الآخر أو بانقضاء ثلاث حيض كذا في العتابية. و هذه الحيض لا تكون عدة و لهذا يستوي فيها المدخول بها و غير المدخول بها الخ (1/338)۔
و فی الدر : و ینعقد بایجاب من احدھما و قبول من الآخر الخ (3/9)۔
و فیه ایضا : شرط حضور شاھدین حرین مکلفین سامعین قولھما معاً اھ(3/22)۔