مروجہ حیلہ اسقاط اور میت پر دورانِ قرآن کی شرعی حیثیت

کیا فرماتے ہیں علماءِ دین اس مسئلے میں کہ جب انسان مرجاتا ہے، تو کچھ لوگ جنازہ ادا کرنے کے بعد اس کی میت پر دورانِ قرآن پاک کرتے ہیں، اس طریقے پر کہ کچھ آدمی دائرے کی شکل میں کھڑے ہوجاتے ہیں قرآن پاک کا دوران کرتے ہیں اور اکثر علماءِ کرام نے اس مسئلے پر تصدیقی دستخط کئے ہیں کہ صحیح ہے اور جائز ہے اور کچھ علماء کرام مذکورہ مسئلے کو ناجائز قرار دیتے ہیں، کیا قرآن پاک کا دوران میت پر کرنا جائز ہے یا ناجائز؟

الجوابُ حامِدا ًو مُصلیِّا ً

صورتِ مسئولہ میں جس طریقہ مروّجہ کا ذکر ہے، یہ بالکل بدعت ہے اور اس کا ثبوت قرآن و حدیث اور فقہاءِ کرام کی کتابوں میں کہیں مذکور نہیں ہے، اور اگر یہ کوئی کارِ خیر ہوتا تو نبی اکرم ﷺ اور صحابہ کرامؓ اس کے زیادہ حقدار تھے کہ وہ اس طریقے کو اختیار کرتے کیونکہ ان کی شفقت عام مؤمنین کے ساتھ بہت بڑھی ہوئی تھی مگر باوجود اس کے، ایسے لوگوں کے لئے جن کے ذمہ نماز، روزہ وغیرہ قضاء واجب ہو ، ان حضرات نے یہ حیلہ تجویز نہیں فرمایا۔
بعض حضرات جو اس عمل کے جواز کے قائل ہیں وہ بعض مخصوص احوال کے پیشِ نظر تھا جو آج کل مفقود ہیں، اور پھر چونکہ اس عمل کو کفن دفن کے اعمال میں سے مستقل ایک ضروری عمل شمار کیا جاتا ہے، اور بہت سے مقامات پر ایسا نہ کرنے والوں کے ساتھ لڑائی اور جھگڑے تک کی نوبت آتی ہے اور جس جائز عمل کے ساتھ اس طرح فرض اور واجب والا معاملہ کیا جانے لگے تو اسی کا نام بدعت ہے اور نبی کریم ﷺ کا فرمان ہے
’’الا کل بدعۃ ضلالۃ وکل ضلالۃ فی النار‘‘۔
کہ ہر بدعت گمراہی ہے اور ہر گمراہی کی جگہ جہنم ہے، لہٰذا اس عمل سے احتراز کرنا لازم ہے۔ واﷲ اعلم