نومسلم کو حکمت کے ساتھ دین سے کیسے قریب کیا جاۓ

کیا فرماتےہیں علماءِ کرام و مفتیانِ عظام اس مسئلہ کے بارے میں کہ ہمارے یہاں ایک نوجوان لڑکا ہندومت سے توبہ تائب ہو کر اسلام قبول کر کے جنت کا حقدار بنا اور اس کے ساتھ اس کے دوبھائی بھی مسلمان ہوئے، جب ماں باپ اور بھائیوں نے یہ حال دیکھا تو ان کو گھر سے نکال دیا ،اس وقت اللہ کی رحمت سےوہ ہمارے سیٹھوں کی ہاتھ لگ گئے تو اِن صاحبان نے ان کو نوکری رہائش کھانا پینا وغیرہ کا انتظام کر کے دیا ،کمپنی کے جامع مسجد میں ان کو کمرہ دیا اور کام بھی کرتے رہے،کچھ عرصہ بعد انہوں نے کام چھوڑ دیا، لیکن سیٹھوں نے اس کو کسی قسم کی تکلیف نہیں دی، اب مسئلہ یہ ہے کہ انہوں نے نماز چھوڑ دی، فجر کی نماز تو بالکل نہیں پڑھتے اور ظہر وعصر کا بھی اہتمام نہیں کرتے، شام کا کھانا کھا کر نکل جاتے ہیں، رات کو بارہ، ایک بجے آکر مسجد کھول کر سو جاتے ہیں اوردن میں ایک بجے کے بعد اٹھتےہیں ، اب سیٹھ لوگ اس بات سے ڈرتے ہیں کہ اللہ نہ کرے، رات کو کوئی ان سے چابی چھین لے اور مسجد میں گھس کر کوئی نقصان کرے، کیونکہ یہ علاقہ خطرناک ہے ، اب اس کے دونوں بھائی مرتد ہو ئے،اس کو اگر سمجھانا چاہے تو وہ کہتے ہیں کہ ان مسلمانوں کو دیکھ کر جی چاہتا ہے کہ واپس ہندومت پر لوٹ جاؤں، اب اس کا سمجھانے کا طریقہ کیا ہے؟ اور کیسے سمجھائیں؟ اب ڈر اس بات کا ہے کہ اگر اس کو سمجھائیں اور یہ زیادہ بگڑ جائے ، اس لیے ہم علماءِ دین سے رابطہ کرتے ہیں تاکہ ہماری رہنمائی کریں اور کسی جرم کا ارتکاب ہم سے نہ ہو ، اب ہم لوگ اس سوال کا جواب قرآن و حدیث کی روشنی میں چاہتے ہیں کہ شرعاً اس کا کیا حل ہے؟

الجوابُ حامِدا ًو مُصلیِّا ً

اس صورت حال میں سائل اور اس کے مذکور سیٹھ کو چاہیے کہ اس نو مسلم کو علم دین سیکھنے کے لیے قریب کے کسی مستند و معتمد دینی درسگاہ لے جائیں یاکچھ وقت کے لیے تبلیغی جماعت کے ساتھ بھیج دیں، تاکہ وہ اپنی نماز، روزہ، اور دیگر احکاماتِ اسلامیہ کو بخوبی سیکھ سکے۔ واللہ اعلم بالصواب!