نومسلم لڑکی کا شرعی احکام کی پابندی نہ کرنا

السلام علیکم!میراسوال یہ ہےکہاگرکوئی مسلمان آدمی کسی یہودی لڑکی کو مسلمان کرکے نکاح کرلے،اور وہ لڑکی صرف رمضان میں بغیرنماز کے روزہ رکھے ،اور غیرشرعی لباس پہنے ،زندگی یہودیوں کی طرح ہی گزارے ،لیکن مسلمان ہو،تو یہ مسلم کہلائے گی یانہیں؟۔

الجوابُ حامِدا ًو مُصلیِّا ً

سوال میں مذکورلڑکی نے اگرمحض اس رشتے کی خاطروقتی طورپر اپنا مذہب ترک نہ کیا ہو،بلکہ واقعۃ دین اسلام کی عظمت اور حقانیت سے متاثرہوکر دائرہ اسلام میں داخل ہوچکی ہو،تووہ بلاشبہ مسلمان کہلائے گی ،اگرچہ وہ رمضان وغیررمضان میں نماز نہ پڑھے اور اس کا لباس بھی شرع کے مطابق نہ ہو،اس کے باوجود اس کا یہ اسلام قبول کرنا عنداللہ بہت بڑے اجروثواب کاباعث ہوگا۔تاہم اس خاتون کو چاہئے کہ اس عظیم سعادت کے حصول کے بعد دل سے اس کی قدرکرتے ہوئے شرعی امورکی پابندی کرے۔ شوہراوردیگرلوگوں کو بھی چاہئے کہ ایسی خاتون کو حکمت اور بصیرت کے ساتھ دینی اعمال کی پابندی کرنے کی ترغیب دیاکریں۔

مأخَذُ الفَتوی

قال اللّٰہ تعالیٰ:وَمَنْ یَّبْتَغِ غَیْرَ الْاِسْلَامِ دِیْنًا فَلَنْ یُّقْبَلَ مِنْہُ وَھُوَ فِی الْاٰخِرَۃِ مِنَ الْخٰسِرِیْن۔الایۃ(العمران ایت85)