کیا نومسلمہ کے احکامِ اسلام پر عمل نہ کرنے سے ایمان ختم ہوجاتا ہے؟؟

السلام علیکم!
محترم مفتی صاحب! میں نے ایک غیر مسلمہ عورت کو مسلمان کر کے شادی کی کچھ ماہ پہلے ہمارا آپس میں جھگڑا ہو گیا اور وہ اپنے خاندان چلی گئی ابھی کچھ عرصہ بعد وہ دوبارہ واپس آگئی، لیکن اب وہ اسلام پر عمل پیرا نہیں، ہماری شادی کی کیا حیثیت ہے؟ جبکہ میں نے یہ بات واضح کر دی تھی کہ مسلمان ہوئے بغیر ہم ایک ساتھ نہیں رہ سکتے ۔ مجھے اُمید ہے کہ وہ دوبارہ اسلام پر عمل کرنا اور اسے سیکھنا شروع کریگی، برائے مہر بانی ہمیں بتائیں کہ کس طرح سے ہمارا دوبارہ نکاح ہو سکتاہے؟ کیا اسے دوبارہ کلمہ پڑھنا ہوگا ؟اور اب ہم ایک ساتھ رہتے ہیں کیا یہ درست ہے یا نہیں ؟

الجوابُ حامِدا ًو مُصلیِّا ً

اگر مذکور جھگڑے سے قبل وہ بلا شبہ اپنے کفریہ عقائد سے تائب ہو کر اسلام کے دائرہ میں آگئی ہو اور اس کے بعد نکاح ہوا ہو اور مذکور جھگڑے کے دوران یا اس سے پہلے اور بعد میں سائل نے اسے طلاق بھی نہ دی ہو تو وہ دونوں باہم میاں بیوی کی حیثیت سے زندگی بسر کر سکتے ہیں، جبکہ بیوی کو اسلامی تعلیمات سے روشناس کرنا لازم ہے، ورنہ جو بھی صورت ہو اس کی تفصیل لکھ کر دوبارہ حکمِ شرعی معلوم کیا جا سکتا ہے۔

مأخَذُ الفَتوی

کمافی شرح فقہ الاکبر: ثم اعلم ان من اراد ان یکون مسلماً عند جمیع طوائف الاسلام فعلیہ ان یتوب من جمیع الآثام صغیرھا وکبیرھا سواء مایتعلق بالاعمال الظاھرۃ او بالاخلاق الباطنۃ ثم یجب علیہ ان یحفظ نفسہ فی الاقوال والافعال والاحوال من الوقوع فی الارتداد اھ(ص/161)۔
وفی الھندیۃ: (كتاب الطلاق) (أما تفسيره) شرعا فهو رفع قيد النكاح حالا أو مآلا بلفظ مخصوص كذا في البحر الرائق (وأما ركنه) فقوله: أنت طالق. ونحوه كذا في الكافي اھ(1/348)۔