آپﷺ پر کچر ا پھیکنے والی عورت کے واقعہ کی حقیقت اور تحقیق

کچرا والی بوڑھیا کا واقعہ من گھڑت ہے ؟ مولانا طلحہ السیف صاحب اس واقعے کو من گھڑت کہتے ہیں ،جبکہ مولانا مکی صاحب کہتے ہیں کہ سچا واقعہ ہے۔

الجوابُ حامِدا ًو مُصلیِّا ً

تلاش بسیار کے باوجود یہ واقعہ ہمیں کسی معتبر کتاب میں نہیں ملا ، لہذا جب تک اس کی کوئی معتبر روایت نہ ملے، اسے رسول اللہ ﷺ کی طرف منسوب کر کے ذکر کرنے سے احتراز چاہئے۔
یہ غیر معتبر روایت یوں ہے کہ ایک عورت آپ ﷺ کے راستے میں کانٹے بچھا دیتی تھی اور جب آپ ﷺ گزرتے تو آپ ﷺ پر کچرا پھینکتی تھی، ایک دفعہ کا ذکر ہے کہ آپ ﷺ اس جگہ سے گزرے تو وہاں کانٹے نہیں تھے ، آپ ﷺ کو تعجب ہوا، آپ ﷺ نے لوگوں نے پوچھا کہ یہاں ایک عورت مجھ پر کچرا پھینکتی تھی وہ کہاں ہے ، آج اس نے کچرا نہیں پھینکا؟ لوگوں نے بتایا کہ وہ بیمار ہے ، آپ ﷺ اس کی عیادت کرنے اس کے گھر گئے اور اس کی خیریت دریافت کی، اس عورت نے جب آپ ﷺ کے یہ اخلاق دیکھے تو بہت متاثر ہوئی، اور بالآخر مسلمان ہو گئی۔
روایت کا حکم : تلاش بسیار کے باوجود یہ روایت سندا تا حال ہمیں کہیں نہیں مل سکی، اور جب تک اس کی کوئی معتبر سند نہ ملے اسے آپ ﷺ کےانتساب سے بیان کرنا مو قوف رکھا جائے، کیونکہ آپ ﷺ کی جانب صرف ایسا کلام و واقعہ ہی منسوب کیا جا سکتا ہے جو معتبر سند سے ثابت ہو۔