مستقل ملازمت کی جگہ، جہاں سے عموماً ہفتہ میں ایک بار گھر آنا ہوتا ہے ،وہاں نمازِ قصر کاحکم

میرا گھر کوٹری، جامشورو میں ہے، میں کراچی میں سرکاری ملازم ہوں، میں اتوار شام کراچی آجاتا ہوں اور پھر جمعہ کے دن واپس جاتا ہوں، یہاں کراچی میں پانچ دن قیام کرتا ہوں، کراچی میں ہم چار لڑکے ایک کرائے کے مکان میں رہتے ہیں، اب سوال یہ ہے کہ کراچی رہتے ہوئے ، میں قصر نماز پڑھوں یا پوری نماز ؟ اور اگر کسی ہفتے پندرہ دن سے زیادہ قیام کا ارادہ ہو تو پھر کیا حکم ہے؟ کوئی کہتا ہے مجھے کراچی میں بھی پوری نماز پڑھنی ہوگی ، کیونکہ یہاں میری اقامت گاہ ہے اور کوئی کہتا ہے قصر پڑھنی ہوگی، راہ نمائی فرما ئیں۔

الجوابُ حامِدا ًو مُصلیِّا ً

سائل نے اگر ایک مرتبہ بھی کراچی میں پندرہ دن یا اس سے زیادہ قیام کر لیا ہو ، جبکہ اس کا باقاعدہ رہائش کا ضروری سامان بھی وہاں رہائش گاہ پر موجود رہتا ہو ، تو شرعاً مقیم شمار ہو گا اور اس کے بعد جب بھی کراچی آئے گا اگرچہ پندرہ دن سے کم کا ارادہ کیوں نہ ہو ، پوری نماز پڑھے گا،اور اگر ایک مرتبہ بھی کراچی میں اس مقام پر پندرہ دن یا اس سے زیادہ کا قیام نہ ہوا ہو ،تو وہ بدستور مسافر ہی رہے گا اور اپنی تنہا نماز میں قصر کرے گا ۔

مأخَذُ الفَتوی

في الفتاویٰ الهندية : و لا يزال على حكم السفر حتى ينوي الإقامة في بلدة أو قرية خمسة عشر يوماً أو اكثر اھ (۱/ ۱۳۹)۔
و في الفقه على المذاهب الأربعة : وطن أصلي، و هو الذي ولد فيه الإنسان ، أو له فيه زوج في عصمته ، أو قصد أن يرتزق فيه ، و إن لم يولد به ، و لم يكن له به زوج ؛ و وطن إقامة ، و هو المكان الصالح للإقامة فيه مدة خمسة عشر يوماً ، فأكثر إذا نوى الإقامة اھ (1/ 435)۔