الکوحل ملی دوا استعمال کرنے کا حکم

السلام علیکم ! شراب کے حرام ہونے کا ذکر قرآن میں واضح طریقے سے آچکا۔ مجھے یہ معلوم کرنا ہے کہ کچھ لوگ کہتے ہیں کہ اگر شراب دواء میں ملا ہو تو وہ حرام نہیں ہوتا۔ مثال کے طور پر ہو میوپیتھک کی دواؤں میں اکثر الکوحل ملا ہوا ہوتا ہے ،جو کے شراب ہے ،تو کیا شراب کے ایسے استعمال جائز ہیں؟ میں نے سنا ہے کہ اللہ کے رسول ﷺ کی ایک حدیث ہے، جس کا مفہوم ہے کہ جس چیز کی کثیر مقدار حرام ہے ،اُس کی کم مقدار حرام ہے ،تو اس رُو سے تو پھر شراب کا دواء میں استعمال بھی حرام ہوگا ؟ برائے مہربانی تفصیل سے جواب عنایت فرمائیں ۔

الجوابُ حامِدا ًو مُصلیِّا ً

شراب کی حرمت قرآن وحدیث کی واضح نصوص سے ثابت ہے،اور اس کی قلیل اور کثیر مقدار کا استعمال حرام ہے، اگر یہ کسی دواء میں ڈالی جائے، اور کسی کیمیاوی طریقہ سے اس کی ماہیت کو بھی تبدیل نہ کیا گیا ہو تو(عام حالات میں)ایسی دواء کا استعمال بھی حرام ہے، مگر واضح رہے کہ آج کل دوائیوں میں جو الکوحل ملائی جاتی ہے ،وہ عموماً انگور اور کھجور کے علاوہ دیگر اشیاء مثلاً جو ، گندھک اور دیگر پھولوں اور سبزیوں سے بھی کشیدہ ہوتے ہیں اور ایسے الکوحل کا استعمال مختلف فیہ ہے، اس لئے اس قسم کی دوائیوں کا استعمال مطلقا نا جائز اور حرام نہیں، بلکہ اس کے استعمال کی گنجائش ہے، اگر چہ ایسے دوائیوں سے احتراز بہتر ہے۔ تاہم اگر یہ تحقیق سے معلوم ہو جائے کہ وہ انگور اور کھجور سے بنائی ہوئی ہے اور کسی کیمیائی طریقے سے اس کی ماہیت کو تبدیل نہ کیا گیا ہو تو ایسی دوائیاں بلاشبہ ناپاک اور اس کا خارجی و داخلی استعمال شرعا جائز نہیں۔

مأخَذُ الفَتوی

ففي تكملة فتح الملهم: وبهذا یتین حكم الكوحل المسكرة التي عمت بها البلوى اليوم فإنها تستعمل في كثير من الأدوية والعطور والمركبات الأخرى، فإنها إن اتخذت من العنب أو التمر فلا سبيل إلى حلّتها أو طهارتها وإن اتخذت من غيرها فالأمر فيها سهل اھ ( ۳/ ۶۰۸).
وفيھا أيضا: فالحاصل أن هذه (الكوحل ) لو لم تكن مصنوعة من العنب والتمر فبيعها للأعراض الكيمياوية جائز باتفاق بين أبی حنیفة وصاحبيه وإن كانت مصنوعة من التمر أو من المطوخ من عصير العنب فكذالك عند أبی حنیفة اھ (۱/ ۵۵۱) والله اعلم بالصواب!