کیا فرماتے ہیں علماء کرام مندرجہ ذیل مسئلہ کے بارے میں کہ: میں مسمیٰ ثاء کی بیوی عین نے میری اجازت ورضامندی کے بغیر اور بغیر کسی اطلاع کے عدالت سے یکطرفہ خلع کی ڈگری لی تھی،اور اب وہ دوبارہ آکر میرے پاس بغیر نکاح کے رہنے لگی ہے،اپنے بچوں کے ساتھ۔ توکیا ایسی صورت میں ان کا میرے گھر رہنا جائز ہے کہ نہیں؟ اور کیا ہمیں دوبارہ نکاح کرنے کی ضرورت ہے؟جو بھی شرعی حکم ہو تحریر فرمائیں!
واضح رہے کہ خلع بھی دیگر عقود مالیہ کی طرح ایک عقد ہے، جس کی صحت اور درستگی کے لیے جانبین کی رضامندی کے ساتھ ایجاب و قبول ضروری ہے، لہذا اگر سائل یا اس کے وکیل نے عدالت میں جاکر خلع پر رضامندی ظاہر کرتے ہوئے خلع کے پیپر پر دستخط نہ کیے ہوں، بلکہ سائل کی بیوی نے عدالت سے یکطرفہ کاروائی کرکے خلع کی ڈگری حاصل کرلی ہو ( جیساکہ سائل کے بیان اور دستاویزات سے معلوم ہورہاہے) تو یہ خلع شرعاً معتبر نہیں ہے، اس لئے اس سے شرعا ان دونوں کانکاح ختم نہیں ہواہے، بلکہ سائل اور اس کی بیوی کا نکاح بدستور برقرار ہے ، لہذ ا اب اگر دونوں ساتھ رہنا چاہیں، تو بغیر تجدید نکاح اور مہر کے ساتھ رہ سکتے ہیں، تاہم اگر دونوں تجدید نکاح کرنا چاہیں تو اس میں بھی کوئی حرج نہیں۔
كما في احكام القرآن للجصاص: قال أصحابنا إنهما لا يجوز خلعهما إلا برضى الزوجين فقال أصحابنا ليس للحكمين أن يفرقا إلا برضى الزوجين لأن الحاكم لا يملك ذلك فكيف يمكه الحكمان وإنما الحكمان وكيلان لهما أحدهما وكيل المرأة والأخروكيل الزوج في الخلع (الى قوله) وكيف يجوز للحكمين أن يخلعا بغير رضاه ويخر جا المال من ملكها الخ ( باب الحکمین کیف یعملان، ج :2، ص:191،مط:سھیل اکیڈمی لاھور)
وفي المبسوط لشمس الدين السرخسي : (قال) والخلع جائز عند السلطان وغيره لانه عقد يعتمد التراضي كسائر العقود وهو منزلة الطلاق الخ ( باب الخلع ،ج: 6ص:173،مط:دار الفکر)
وفی التاتار خانیۃ:الخلع عقد یفتقر الی الایجاب والقبول یثبت الفرقۃ و یستحق علیھا العوض الخ(الفصل السادس العشر فی الخلع،ج:5،ص:5،مط:مکتبہ رشیدیہ)