کیا فرماتے ہیں علماء کرام اور مفتیان عظام مذکورہ مسئلہ کے بارے میں کہ محراب میں امام اعتکاف کی نیت سے بیٹھ سکتا ہے کہ نہیں کیونکہ اس رمضان میں ایک مسجد میں گیا تو دیکھا کہ امام محراب کے اندر اعتکاف کر کے بیٹھا ہے اور ایک پردہ لگایا ہے ۔ جب نماز کا وقت ہوتا ہے تو وہ امام اس پر دے کو ہٹا کر محراب کے اندر بھی کھڑے ہو کر جماعت کراتا ہے اور جب نماز ختم ہو جاتی ہے تو پردہ کو واپس کر کے باقی نماز بھی پردے کے اندر ادا کرتا ہے۔ مسئلہ دریافت یہ ہےکہ آیا محراب کے اندر اعتکاف کی نیت سے بیٹھا جا سکتا ہے یا نہیں؟ اگر بیٹھنا جائز ہے تو نماز محراب کے اندر کھڑے ہو کر پڑھا سکتا ہے یا کہ نہیں اگر پڑھا سکتا ہے تو پھر "وکرہ قیام الامام في المحراب في الصلاة چی معنی دارد " کیونکہ میں خود بہت جستجو کی لیکن کسی کتاب میں کافی شافی جواب نہیں ملا ۔
اس لئے آپ صاحبان سے گزارش ہے کہ آپ اس کا حل قرآن و حدیث روشنی میں عنایت فرما کر شکریہ کا موقع عنایت فرمائیں۔
محراب بھی مسجد کا ہی حصہ ہے اس لئے محراب کے اندر اعتکاف میں بیٹھنا جائز ہے ۔ عدم جواز کی کوئی وجہ موجود نہیں البتہ نماز پڑھانے کے لیے اس طرح کھڑا ہونا چاہیے کہ قدم محراب سے باہر رہیں ۔
کمافي حاشية ابن عابدين (رد المحتار): : أي لأن المحراب إنما بني علامة لمحل قيام الإمام ليكون قيامه وسط الصف كما هو السنة، لا لأن يقوم في داخله، فهو وإن كان من بقاع المسجد لكن أشبه مكانا آخر فأورث الكراهة اھ (1/ 646) والله اعلم بالصواب