کیا فرماتے ہیں علماء دین ومفتیان کرام اعتکاف کے ان مندرجہ مسائل کے بارے میں کہ:
۱ : اعتکاف کی نیت کیسے کرے ؟
۲: کیا اعتکاف میں پردہ لگانا ضروری ہے ؟
۳: کیا اعتکاف میں چہرہ چھپانا ضروری ہے؟
۴:کیا اعتکاف میں دنیاوی باتیں کرنے سے اعتکاف ٹوٹ جائیگا ؟
۵: معتکفین حضرات آپس میں بیٹھ کر مذاق یا بات کریں تو کیا اعتکاف ٹوٹ جائیگا ؟
۶: معتکفین کا قہقہ لگا کر ہنسنا کیسا ہے جائز یا ناجائز ؟
۱: اعتکاف میں بیٹھتے وقت دل میں یہ نیت ہو کہ اللہ تعالیٰ کی رضا کے لیے رمضان المبارک کے آخری عشرہ کا مسنون اعتکاف کرتا ہوں ۔
۲، ۳:پر دے معتکف کی تنہائی ویکسوئی اور آرام وغیرہ کے لیے لگائے جاتے ہیں اور یہ مسنون ہیں۔ ورنہ اعتکاف ان کے بغیر بھی ہو جاتا ہے اور دوران اعتکاف چہرہ کا چھپانا ضروری نہیں ۔
۴، ۵، ۶: اعتکاف میں بقدر ضرورت دنیاوی باتیں کر سکتے ہیں ضرورت سے زیادہ نہیں۔ جبکہ آپس میں بیٹھ کر قہقہ یا گپ شپ لگانے وغیرہ سے اگرچہ ضابطہ کے لحاظ سے اعتکاف نہیں ٹوٹتا لیکن اس قسم کی حرکات سے اعتکاف کے فوائد مقصودہ فوت ہو جاتے ہیں ۔