بسم اللہ الرحمن الرحیم
السلام علیکم ورحمت اللہ وبرکاتہ
کیا فرماتے ہیں علمائے دین ومفتیانِ شرعِ متین بیچ اس مسئلہ کے کہ:
ایک پبلک رجسٹرڈ کمپنی ہے، جس کے مالکان (بورڈ آف ڈائریکٹرز) نے اپنی باہمی رضامندی اور اجتماعی فیصلے سے یہ طے کیا ہے کہ کمپنی کی ہر مالی سال کی مجموعی سیل/آمدن سے اڑھائی فیصد (2.5\%) حصہ خالصتاً "انفاق فی سبیل اللہ" اور کارِ خیر کی غرض سے مختص کیا جائے گا۔ چنانچہ اس طے شدہ ضابطے کے تحت یہ فنڈ اب تک خالص شرعی و رفاہی امور مثلاً: ہسپتالوں اور ڈسپنسریوں کا قیام، دسترخوان، بیواؤں اور یتیموں کی کفالت، بے سہارا بچیوں کی شادیاں، نادار ومقروض افراد کی مالی معاونت، نیز دینی و عصری تعلیم (حفظ و دورۂ حدیث سے لے کر پرائمری تا ماسٹرز لیول) کی فراہمی اور یتیم خانوں کے جملہ اخراجات پر صرف کیا جاتا رہا ہے۔
اب قابلِ استفسار امور یہ ہیں کہ:
۱۔ کیا انفاق فی سبیل اللہ اور کارِ خیر کی غرض سے قائم کردہ اس رفاہی فنڈ کو، اس کے اصل دینی و رفاہی مصارف سے ہٹا کر، محض تفریح، کھیل کود کے فروغ اور غیر نصابی سرگرمیوں کے نام پر کسی کرکٹ ٹیم پر صرف کرنا شرعاً جائز ہے؟ جب کہ کھیل کود بذاتِ خود مقاصدِ شریعت اور انفاق فی سبیل اللہ کے بنیادی تصور کے خلاف نظر آتا ہے۔
۲۔ کیا اس فنڈ کو ایسے لڑکوں کو ابتدائی سطح سے لے کر قومی سطح (National Level) تک کرکٹ کی ٹریننگ دینے پر لگایا جا سکتا ہے، جن کے انتخاب میں ان کے شرعی مستحق (فقیر یا نادار) ہونے کا بالکل لحاظ نہیں رکھا جاتا، بلکہ مالدار اور صاحبِ ثروت لڑکوں کو بھی اس فنڈ سے نوازا جاتا ہے؟ کیا غیر مستحقین اور اغنیاء (امیروں) پر انفاق فی سبیل اللہ کی رقم لگانا جائز ہے؟
۳۔ کیا اس فنڈ سے کرکٹ ٹیم کے کھلاڑیوں اور کوچز کی باقاعدہ بھاری تنخواہیں ادا کرنا، کھیل کے مہنگے سامان کی فراہمی، گراؤنڈز کے کرائے اور کھیل سے متعلقہ دیگر تعیشات پر مبنی جملہ اخراجات پورے کرنا شرعاً درست ہے؟ یا یہ رقم صرف اور صرف مستحقینِ زکوٰۃ، فقراء اور خالص روایتی دینی و رفاہی امور ہی کے لیے مخصوص رکھنا شرعاً لازم ہے؟
بَیِّنُوْا تُؤْجَرُوْا
صورتِ مسئولہ میں اگر کمپنی کے مالکان نے باہمی رضامندی سے کمپنی کی آمدن کا 2.5% حصہ "انفاق فی سبیل اللہ" اور رفاہِ عامہ کے لیے مستقل طور پر مختص کردیا ہو، تو اس فنڈ کو اسی مقصد کے مطابق ایسے مصارف میں خرچ کرنا لازم ہوگا جو اس کے مقررہ مقصد کے موافق ہوں۔ لہٰذا ہسپتالوں، مستحق مریضوں، بیواؤں، یتیموں، مقروضوں، ضرورت مند افراد اور دینی و تعلیمی رفاہی منصوبوں پر اس فنڈ کا خرچ کرنا درست ہے۔
البتہ اس فنڈکواس کے مقصد سے ہٹا کرمحض کھیل کود، تفریح یا کرکٹ ٹیم کی سرپرستی، کھلاڑیوں اور کوچز کی تنخواہوں، کھیل کے سامان، گراؤنڈ کے کرایہ اور دیگر متعلقہ اخراجات پر صرف کرنا، جبکہ یہ امور اس فنڈ کے مقررہ مقصد میں شامل نہ ہوں، شرعاً درست نہیں۔جس سے احترازچاہیے ۔
تاہم اگر کمپنی کے مالکان باہمی رضامندی سے آئندہ کے لیےکمپنی کےمنافع سےکوئی بجٹ مقرر کرکے کھیلوں یا دیگر جائز سماجی سرگرمیوں کی سرپرستی کرنا چاہیں، تو اس کی گنجائش ہے، لیکن "انفاق فی سبیل اللہ" اور رفاہِ عامہ کے نام سے مخصوص فنڈ کو اس کے متعین مقاصد سے ہٹا کر ایسے مصارف میں صرف کرنے سے اجتناب لازم ہے۔