میں آن لائن قربانی کرتی ہوں، لیکن مجھے کچھ دن پہلے پتہ چلا ہے کہ آن لائن قربانی کے اداروں میں ایک دن پہلے قربانی کر کے رکھ لی جاتی ہے اور عید والے دن بھیج دیتے ہیں، کیا اس طرح قربانی قبول ہو جاتی ہے، کیونکہ میں تو پہلے یا دوسرے دن کی نیت سے ہی بکنگ کرواتی ہوں۔
واضح ہوکہ مذکور طریقے سے قربانی کرنے سے شرعاً قربانی ادا نہیں ہوتی،بلکہ متعلقہ فرد کے ذمہ بدستور یہ فریضہ برقرار رہتا ہے، لہذا سائلہ کو اگر کسی ادارے کے بارے میں یقینی طور پر اس بات کا علم ہو کہ وہ پہلے سے قربانی کرکے رکھ لیتے ہیں اور ایام عید آنے پر گوشت شرکاء کے حوالہ کردیتے ہیں، تو سائلہ کو آئندہ ایسے ادارے کے ذریعہ قربانی کروانے سے احتراز لازم ہے۔
کما فی الھندیۃ: وقت الأضحية ثلاثة أيام العاشر والحادي عشر والثاني عشر، أولها أفضلها وآخرها أدونها، ويجوز في نهارها وليلها بعد طلوع الفجر من يوم النحر إلى غروب الشمس من اليوم الثاني عشرالخ(باب في وقت الأضحية،ج5،ص295،ط:ماجدیہ)۔
وفیہ ایضاً: ولو ذبح والإمام في خلال الصلاة لا يجوز، وكذا إذا ضحى قبل أن يقعد قدر التشهد الخ (باب في وقت الأضحية،ج5،ص295،ط:ماجدیہ)۔