ملیشیا کے مشینی ذبیحہ کا حکم

السلام علیکم ورحمتہ اللہ وبرکاتہ!
مفتی صاحب! میں ملیشیا میں کام کرتا ہوں، یہاں پہلے سے ذبح شدہ مرغی کھانے سےمتعلق راہ نمائی فرما دیں ۔ اگر کسی اسٹور پر گورنمنٹ کے تصدیق شدہ حلال سرٹیفکیٹ آویزاں ہوں تو وہاں سے ذبح شدہ مرغی اور دوسرے حلال جانوروں کا گوشت لے کر استعمال کر سکتے ہیں؟ جبکہ یہاں رہنے والے عوام بھی یہی استعمال کرتے ہوں ۔ یہ یقینی طور پرمعلوم نہ ہو کہ یہ مشینی ذبیحہ ہے یا ہاتھ کا، اور اس کی تصدیق کے لئے کسی غیر مسلم یا عام مسلمان کی بات کا اعتبار کیا جا سکتا ہے؟
نوٹ: میں بھی یہاں فوڈ کمپنی میں کام کرتا ہوں، ہمارے ہاں آڈٹ وغیرہ ہوتے رہتے ہیں، غالب گمان یہی ہے یہاں ہر کمپنی میں آڈٹ کا نظام بہتر ہے۔

الجوابُ حامِدا ًو مُصلیِّا ً

مسئولہ صورت میں گورنمنٹ اگر مکمل تحقیق وتفتیش کے بعدکسی بھی شخص یا فرم کوحلال کا سرٹیفکیٹ جاری کرتی ہو اور اس کی طرف سے ابھی تک کسی قسم کی غفلت اور کوتاہی بھی سامنے نہ آئی ہو،یا مشینی ذبیحہ ہونے کی صورت میں اسٹننگ کے طے شدہ ضابطوں کے مطابق ذبح کا عمل انجام دیا جاتا ہو،اور اس کی کڑی نگرانی کا بھی مکمل نظام موجود ہو،تو ایسی صورت میں سائل کیلئے گورنمنٹ کی تحقیق پر اعتماد کرتے ہوئےمذکور گوشت کے استعمال کی شرعاً گنجائش ہے،ورنہ سائل کو چاہیئے کہ اگر ممکن ہو تو اپنے سامنے مرغی ذبح کرواکر اس کا گوشت استعمال کرنے کی کوشش کرے،جبکہ گوشت کی حلت سے متعلق عام مسلمان کی بات کا تو اعتبار ہے،لیکن غیر مسلم کا قول اس بابت شرعاً معتبر نہیں۔

مأخَذُ الفَتوی

کما فی البحر الرائق شرح كنز الدقائق (8/ 212)
الحل والحرمة من الديانات ولا يقبل قول الكافر في الديانات، وإنما يقبل قوله: في المعاملات خاصة للضرورة. . . .والفاسق فی المعاملات لا فی الدیانات.
وفی الاختيار لتعليل المختار (3/ 96)
ولا نفاذ لقول الكافر على المسلم كما في الشهادة.