امانت کی رقم واپس نہ کرنا

السلام علیکم !
کیا فرماتے ہیں مفتیانِ کرام اس مسئلے کے بارے میں کہ: میرے بہنوئی فیملی کے ساتھ سعودیہ میں کام کرتے تھے ,وہ ہر مہینے تنخواہ سےزکوۃ کے پیسے نکال لیا کرتے تھے ،جب وہ ریٹائرڈ ہو کر واپس آئے ، تو انہوں نے یہاں پر کام کرنے کی کوشش کی ، لیکن کوئی کام مناسب نہیں ملا ،کچھ عرصے بعد میری چھوٹی بہن اور بہنوئی میرے گھر آئے اور مجھے ایک ایک تولہ کی دو اینٹیں دیں کہ یہ دونوں بیٹیوں کے لئے ہیں کہ جب ان کی شادی ہو تو ان کو دے دینا ، اور یہ بھی بتایا ہے کہ یہ زکوۃ کے پیسوں سے ہم نے تمہاری بیٹیوں کے لئے رکھا تھا، میری بہن اور بہنوئی کو میرے گھر کے حالات معلوم تھے کہ میں بیٹیوں کی شادی کا خرچہ نہیں اٹھا سکتا اور بے روزگار ہوں، میں نے اللہ کا شکر ادا کیا اور دونوں اینٹ امانت کے طور پر اپنی بہن کو واپس کردیں، جب دونوں بیٹیوں کی شادی ہو تو اس وقت مجھے دے دینا ، جس کی زکوۃ میری دونوں بیٹیاں ادا کرتی ہیں ، جب میری ایک بیٹی کی شادی ہوئی تو انہوں نے ایک اینٹ تو مجھے واپس کر دی ،لیکن کچھ اختلافیوں اور گھریلو جھگڑوں کی وجہ سے میری بہن نے دوسری اینٹ دینے سے منع کردیا زبانی طور پر، برائے مہربانی اپ اس مسئلے پر اپنی رہنمائی کیجئے۔جزاک اللہ

الجوابُ حامِدا ًو مُصلیِّا ً

سوال میں ذکرکردہ وضاحت کے مطابق اگر سائل کی دونوں بیٹیاں واقعۃً مستحق زکوٰۃ ہوں ، اور سائل کی بہن اور بہنوئی نے زکوٰۃ کی مد میں مذکور دوتولہ سونا ہر ایک بیٹی کو دیدیا تھا ، تو دونوں بیٹیاں اس سونے کی شرعاً مالک بن گئیں،چنانچہ اس کےبعد اگر سائل نے مذکور دوتولہ سونا اپنی بہن کے پاس بطورِ امانت رکھوایا تھا، تو اب سائل کی مذکور بہن پر دونوں سونے کی ٹکیہ واپس کرنا شرعاً لازم ہے،اگر واقعۃً سائل کی بہن مذکور ایک تولہ سونا واپس نہیں کرتی ، تو یہ غصب کی زمرے میں آنے کی وجہ سے شرعاً جائز نہیں،لہذا اس پر لازم ہے کہ اپنی بھتیجی کاحق دیکر مواخذہ دنیوی واخروی سے سبکدوشی حاصل کرے،ورنہ اپنے حق کی وصولی کی خاطر سائل قانونی چارہ جوئی کا بھی مجاز ہے۔

مأخَذُ الفَتوی

کما فی الھدایة: الهبة عقد مشروع (الی قوله) "وتصح بالإيجاب والقبول والقبض والقبض لا بد منه لثبوت الملك اھ(238/3)
وفی الھندیة:وأما حكمها فوجوب الحفظ على المودع وصيرورة المال أمانة في يده ووجوب أدائه عند طلب مالكه، كذا في الشمني اھ(338/4)واللہ اعلم