حرام خور سے کوئی چیز گفٹ وغیرہ لینا

السلام علیکم
اُمید ہے آپ خیریت سے ہونگے ، میرا سوال یہ ہے کہ میں پیٹرول پمپ پر کام کرتا ہوں جہاں پر ہیڈ کیشئر جو پیٹرول ڈلوانے والے لوگ آتے ہیں اُن سے کبھی کوئی ڈنڈی مار لی یا اُن سے کبھی ایسا ہوتا ہے کہ پیٹرول اُنکو کم ڈالا کارڈ زیادہ کا لگالیا توا س طرح کرکے اسکے بعد کچھ پیسے بچتے ہیں تو وہ تقریباً جائز پیسے نہیں ہوتے، اب جب میں جہاں پر کام کرتا ہوں وہاں پر کمپنی کی طرف سے ہماری تنخواہ بھی بہت زیادہ کم ہے، تو کیا میرے لئے اس بات کی اجازت ہے کہ میں اس سے پیٹرول لے سکتا ہوں ؟ کیونکہ کمپنی نے ہمیں روزانہ پیٹرول الاؤ نہیں کیا ہوا ، لیکن کیشئر اپنی جیب سے ہمیں ان سے پیٹرول دیتا ہے ، تو میرے لئے پیٹرول لینا جائز ہے ؟ اور اگر وہ اپنے پیسوں سے کھانا بھی کھلا رہے ہیں تو اسکے پیسے سے کھانا کھانا جائز ہے ؟

الجوابُ حامِدا ًو مُصلیِّا ً

صورتِ مسئولہ میں اگر ہیڈ کیشئر واقعۃً پیٹرول ڈلوانے والوں کے ساتھ دھوکہ کرتا ہو بایں طور کہ مقدار سے کم پیٹرول ڈال کر زیادہ پیسے وصول کرتا ہو تو اس کا یہ عمل خیانت اور دھوکہ دہی پر مشتمل ہونے کی وجہ سے شرعاً ناجائز و حرام اور گناہِ کبیرہ ہے، جس سے آئندہ کیلئے احتراز لازم ہے، اور اب تک اس طرح دھوکہ دہی کے ذریعے جتنی رقم حاصل کی ہےاگر اصل مالکان معلوم ہوں تو اُن تک مذکور رقم پہنچانا ضروری ہے، ورنہ مذکور رقم مالکان کی طرف سے صدقہ کرنا لازم ہے۔
جبکہ سائل کیلئے مذکور کیشئر سے کھا نا وغیرہ کھانا یا اس رقم سے پیٹرول ڈلوانا بھی شرعاً ناجائز و حرام اور گناہِ کبیرہ ہے جس سے بہر صورت احتراز لازم ہے۔

مأخَذُ الفَتوی

قال اللہ تعالیٰ : ان اللہ لا یحب الخائنین -
و فی صحيح مسلم: عن أبي هريرةؓ أن رسول اللهﷺ قال : «من حمل علينا السلاح فليس منا و من غشنا فليس منا»۔الحدیث (1/99)۔
و فی الفتاوىٰ الھندية : أهدى إلى رجل شيئا أو أضافه إن كان غالب ماله من الحلال فلا بأس إلا أن يعلم بأنه حرام ، فإن كان الغالب هو الحرام ينبغي أن لا يقبل الهدية و لا يأكل الطعام إلا أن يخبره بأنه حلال ورثته أو استقرضته من رجل ، كذا في الينابيع۔اھ (5/342)۔