سیلز مین کے پاس میڈیکل اسٹاف کو دینے والے تحائف کا حکم

ایک صاحب کسی دوائی کی کمپنی کے نمائندے رہے اور اب نوکری چھوڑ دی ہے، کمپنی اپنے سیلز مین کو مختلف مصنوعات دیتی ہے جو وہ ڈاکٹر اور دوسرے میڈیکل اسٹاف کو مہیا کرتےہیں۔ صاحب نے نوکری چھوڑ دی لیکن اس کے پاس کمپنی کی مصنوعات موجود ہیں جن کا کمپنی نے بھی تقاضا نہیں کیا، اب کیا وہ ان مصنوعات کو خود استعمال کر سکتا ہے یا کسی کو تحفے کے طور پر دے سکتا ہے؟

الجوابُ حامِدا ًو مُصلیِّا ً

کمپنی والوں کی طرف سے مصنوعات کی فراہمی اگر اس شرط کے ساتھ مشروط ہو کہ جب تک سیلزمین کمپنی کا ملازم رہے اس وقت تک وہ ان مصنوعات سے فائدہ اٹھا سکتا ہے اور اپنے پاس رکھ کر کسی میڈیکل پر یا ڈاکٹر کو دے سکتا ہے تب تو اس پر لازم ہے کہ وہ یہ مصنوعات کمپنی والوں کو واپس کردے اور اگر کمپنی والوں نے محض تبرعاً اپنے بعض سیلز مینوں کو کوئی چیزدی ہو اور اس کی نوکری چھوڑ نے کی صورت میں واپسی بھی لازمی نہ ہو اور اسی بناء پر کمپنی نے اسکی واپسی کا مطالبہ بھی نہ کیا ہو تو نوکری چھوڑنے کے بعد بھی اس کیلئے اس کو اپنے استعمال میں لانا یا کسی اور کو تحفے میں دینا جائز ہے ورنہ نہیں۔

مأخَذُ الفَتوی

کما فی الدر: (وہی) لغۃ: التفضیل علی الغیر ولو غیر مال وشرعًا (تملیک العین مجّانا أی بلا عوض لا أن عدم العوض شرط فیہ الخ (ج:۵ ص: ۶۸۷)
وفیہ ایضًا: (بعث إلی امرأتہ متاعًا) ہدایا الیہا (بعثت لہ أیضًا) ہدایًا عوض للہبۃ صرحت بالعوض أولا (ثم افترقا بعد الزفاف وادعی الزوج أنہ عاریۃ لاہبۃ وحلف فأراد الاسترداد وأرادت) ہی (الاسترراد) أیضا (یسترد کل) مہنما (ما أعطی) إذ لاھبۃ فلا عوض الخ (ج:۵ ص:۷۰۷) واللہ اعلم