غیر قانونی طور پر بغیر میٹر کےگیس استعمال کرنا

کیا فرماتے ہیں مفتیانِ کرام اس مسئلے کے بارے میں کہ کمپنی کے ملازم پبلک کو بغیر میٹر کےگیس کی سروس دیتے ہیں، اور اس کے عوض میں پبلک سے پیسے بھی لیتے ہیں، اور جب لوگ کمپنی کے پاس جاتے ہیں تو گیس کی گنجائش نہ ہونے کا بولتے ہیں جبکہ ملازم پیسے لے کر بغیر میٹر کے گیس لگا کر دے دیتے ہیں، تقریباً 25 ہزار لیتے ہیں، اب کمپنی کے ملازم نے گیس کی سروس چالو کر کے دے دی ہے، آیا اس گیس کا استعمال ہمارے لئے جائز ہے؟ جبکہ ملازم کا یہ بھی کہنا ہوتا ہے کہ جب میٹر کھلیں گے تو کچھ پیسے مزید لے کر میٹر لگا کے دے دیں گے، اور کمپنی کے افسران بھی انہی ملازمین کی طرف بھیجتے ہیں، آیا بغیر میٹر لگائے ہوئے اس گیس کا استعمال ہمارے لئے جائز ہے ؟

نوٹ: حکومت کی طرف سے اسکی اجازت نہیں ہوتی بلکہ محکمہ کے افسران یا ملازمین اپنے طور پر پیسے لے کر بغیر میٹر کے گیس لگا کر دے دیتے ہیں۔

الجوابُ حامِدا ًو مُصلیِّا ً

سوال میں ذکر کردہ تفصیل کے مطابق کمپنی ملازمین کا کمپنی ذمہ داران کی اجازت اور اٗنکے علم میں لائے بغیرغیر قانونی طور پر لوگوں سے پیسے لے کر گیس کنکشن لگا کر دینا خیانت اور دھوکہ پر مبنی ہونے کی وجہ سے شرعاً جائز نہیں، اور اسی طرح لوگوں سے پیسے وصول کرکے اپنے استعمال میں لانا بھی ناجائز ہے جس سے اجتناب لازم ہے۔

جبکہ عام لوگوں کو اگر اس بات کا علم ہو کہ ملازمین بغیر اجازت کے غیر قانونی طور پر یہ سروس فراہم کرتے ہیں تو اُن کیلئے ملازمین سے گیس کنکشن لگوا کر گیس استعمال کرنا شرعاً جائز نہ ہوگا۔

مأخَذُ الفَتوی

کما قال اللہ تعالیٰ : وَ إِمَّا تَخَافَنَّ مِنْ قَوْمٍ خِيَانَةً فَانْبِذْ إِلَيْهِمْ عَلَى سَوَاءٍ إِنَّ اللَّٰهَ لَايُحِبُّ الْخَائِنِينَ} (الأنفال: 58)۔
و فی صحيح مسلم : عن أبي هريرةؓ أن رسول اللهﷺ قال : «من حمل علينا السلاح فليس منا ، و من غشنا فليس منا»۔الحدیث (1/99)۔
و فی سنن أبی داؤد : عن عبد اللہ بن عمروؓ قال ، لعن رسول اللہ ﷺ الراشی و المرتشی۔الحدیث (3/300)۔